Minsiteri y’ubuzima mu Rwanda yatangaje ko mu gihugu yabonetse “abarwayi bake” bafite virus ya Marburg, kandi harimo gukorwa iperereza ngo hamenyekane aho yaturutse.
Itangazo rya Minisiteri y’ubuzima rivuga ko hashyizweho ingamba zo kuyirinda no kuyikumira mu bitaro no mu bigo nderabuzima bitandukanye.
Iri tangazo ntirivuga ibitaro cyangwa ikigo nderabuzima iyi ndwara yabonetsemo.
Itangazo rya Minisiteri y’ubuzima rikurikiye amakuru atandukanye ku mbuga nkoranyambaga yavugaga ko hari abakora kwa muganga bamaze kwicwa n’iyi ndwara mu minsi micye ishize muri bimwe mu bitaro byo mu mujyi wa Kigali.
Minisiteri y’ubuzima ntiyavuze niba hari umuntu cyangwa abantu bishwe n’iyi ndwara kugeza ubu.
Ni indwara yandurira mu gukora ku maraso n’amatembabuzi y’abantu bayirwaye, ibimenyetso byayo birimo kugira umuriro mwinshi, umutwe ukabije kuruka, kuribwa mu mitsi cyangwa kuribwa mu nda.
Minsiteri y’ubuzima ivuga ko hatangiye igikorwa cyo gushakisha abantu bagiye bakoranaho n’ababonetseho iyi ndwara.
- Virus ya Marburg ni iki?
Ni virus ijya gusa cyane na Ebola, nk’uko ishami rya ONU rishinzwe ubuzima ku isi ribivuga.
Ubushakashatsi kandi bwakozwe na OMS/WHO, bugaragaza ko yica hafi 88% by’abayanduye.
Virus ya Marburg yatangiye kuboneka igihe abantu 31 bayanduriye nyuma y’icyumweru bagapfa mu biza byayo byakurikiranye mu 1967 muri:
- Marburg na Frankfurt, mu Budagi
- Belgrade muri Serbia
Iyi ndwara basanze yaraje iturutse mu nkende zinjijwe mu Budage zivuye muri Uganda.
Ariko kuva icyo gihe iyi virus yagiye ica no mu zindi nyamaswa.
Ahabonetse virus ya Marburg ikomeye:
- 2017 – Uganda: abantu batatu nibo bayanduye, bose barapfuye
- 2012 – Uganda: 15 barayanduye, bane barapfuye
- 2005 – Angola: 374 barayanduye, 329 barapfuye
- 1998-2000 – DR Congo: 154 baranduye, 128 barapfuye
- 1967 – Ubudage: 29 baranduye, barindwi barapfuye (Ivomo: OMS/ WHO)
[BBC & THEUPDATE]