Igihugu cya Nijeri ku Mugabane w’Afurika, cyatangaje ko cyacanye Umubano ushingiye kuri Diporomasi n’icya Ukraine cyo mu Mugabane w’Uburayi.
Nijeri ishinja Ukraine gushyigikira Imitwe y’iterabwoba. Iki cyemezo cya Nijeri gikurikiye icya Mali bihana imbibi, nayo yacanye Umubano na Ukraine mu minsi ishize.
Nyuma y’uko Ukraine yemeye ko yahaye amakuru y’iperereza Imitwe irwanya Ubutegetsi yagize uruhare mu Mirwano yabereye mu Majyaruguru ya Mali igahitana Abasirikare batari bake n’abarwanyi b’Umurwi w’Abacanshuro b’Uburusiya, Wagner.
Umuvugizi wa Leta ya Nijeri, Amadou Abdramane, yatangaje ko bifatanyije n’Abanyamali muri ibi byago bagize.
Yunzemo ko Leta y’Igihugu cye yafashe icyemezo cyo gucana Umubano na Ukraine, kandi ko byahise bitangira gushyirwa mu bikorwa.
Yakomeje avuga ko Nijeri izasaba Akana k’Umuryango w’Abibumbye (UN/ONU) gashinzwe amahoro n’umutekano ku Isi, gufatira ibihano Ukraine bishingiye kuri aya makuru yatanze.
Ku wa mbere w’iki Cyumweru, Mali yacanye Umubano na Ukraine. Byaje nyuma y’uko inzego zishinzwe iperereza za Ukraine zemeye ko zagize uruhare mu guha amakuru abarwanya Ubutegetsi bwa Mali bazwi nk’aba Tuareg, mu gihe bari mu Ntambara n’Ingabo za Leta mu Majyaruguru y’Igihugu mu mpera z’ukwezi kwa Karindwa (7). (AFP)
