U Rwanda rwegukanye Imidali myinshi mu irushanwa ryo kwibuka ku nshuro ya 29 Jenoside yakorewe Abatutsi, ryateguwe Ishyirahamwe ry’umukino wa Kung-fu Wush mu Rwanda.
Rwegukanye iri rushanwa nyuma yo gukusanga Imidali yose hamwe 16 ruhigitse ibihugu birimo; Kenya, Tanzaniya, Uganda, u Burundi na Repubulika ya Demokarasi ya Congo (DR-Congo).
Uretse u Rwanda rwegukanye Imidali 16, Kenya yegukanye 5, Uganda 4, u Burundi 2, mu gihe Tanzaniya na DR-Congo begukanye Umudali umwe.
Iri rushanwa ryakiniwe i Masoro mu Cyanya cyahariwe Inganda,
mu nyubako ya Stecol Corporation taliki ya 17 na 18 Kamena 2023.
Irushanwa ry’itabiriwe n’abakinnyi 114 barimo abakobwa 20 n’abanyamahanga 20 baturutse mu gihugu by’u Rwanda, Tanzaniya, Kenya, Uganda, u Burundi na Repubulika ya Demokarasi ya Congo.
Mbere yo gukina iri rushanwa, tariki 17 Kamena 2023 basuye Urwibutso rwa Jenoside yakorewe Abatutsi rwa Kigali ku Gisozi, bunamira abasaga Ibihumbi 250 barushyinguyemo, banashyira
Indabo ku Mva.
Abitabiriye iyi mikino, bayikinnye mu byiciro bibiri, aribyo; Icyiciro cy’imyiyerekano (Taolu) cyari kigizwe n’abiyereka hakoreshejwe umubiri (Changquan na Nanquan), kwiyereka witwaje Icumu (Qiang shu), kwiyereka witwaje Inkota (Daoshu na NanDao) no kwiyereka witwaje Inkoni cyangwa Ikibando (Gunshu na Nangun).
Mu gihe ikiciro cya kabiri cyaranzwe no kurwana no Gukirana (SANDA).
Aha, abagikinnye bahanganye hakurikje ibiro bafite, guhera ku biro; 48kg-52kg-53kg-56kg-57kg-60kg-61kg-64kg-65kg-70kg-71kg-75kg-76kg-80kg-81kg-85kg-86kg na 90kg.
Agaruka kuri iri rushanwa, Umuyobozi w’Ishyirahamwe ry’Umukino wa Kungfu-Wushu mu Rwanda, Uwiragiye Marc, yishimiye uko ryagenze, by’umwihariko avuga ko yanyuzwe n’umusaruro w’abakinnyi b’Abanyarwanda.
Yunzemo ko ryateguwe mu rwego rwo Kwibuka Abasiporutifu n’abandi bari bafite aho bahuriye n’ibikorwa bya Siporo bazize Jenoside yakorewe Abatutsi mu 1994.
Amafoto
