Ikipe ya Imena Herons n’Ingabo Knights zegukanye intsinzi ku munsi wa mbere w’Irushanwa ‘Elite Women’s League’ ryateguwe n’Ishyirahamwe ry’umukino wa Cricket mu Rwanda (RCA).
Imena Herons yegukanye intsinzi nyuma yo guhigika Amasimbi Howks ku kinyuranyo cy’amanota 28, mu gihe Ingabo Knights yatsinze Ingenzi Heroes ku kinyuranyo cya Wickets 6.
Iri rushanwa ryabimburiwe n’umukino wahuje wahuje Imena Herons na Amasimbi Howks guhera saa 09:30′ ku kibuga cya Gahanga, ukurikirwa n’uwahuje Ingabo Knights na Ingenzi Heroes guhera saa 13:30′.
- Imena Herons vs Amasimbi Howks
Imena Herons 99/10(19,4 Ovrs) vs Amasimbi Howks 71/10(20 Ovrs)
- Ingabo Knights vs INGENZI Heroes
Ingabo Knights 86/4 (15,4 Ovr) vs Ingenzi Heroes 83/10(18,4 Ov)
Muri uyu mukino, Gisele Ishimwe ukinira ikipe ya Ingabo Knights niwe wawuhizemo abandi (Player of the Match).
Iri rushanwa rihuza abakinnyi bahize abandi mu irushanwa ryo Kwibuka Jenoside yakorewe yakorewe Abatutsi mu Rwanda mu 1994.
Bamwe mu bakinnyi bari kurigaragaramo, barimo abakiniye ikipe y’Igihugu ya Uganda, Kenya, Nijeriya na Botswana.
Uganda na Kenya zihagarariwe n’abakinnyi 4 kuri buri kipe, mu gihe Botswana na Nijeriya buri kipe yasize umukinnyi umwe (1).
Agaruka kuri iri rushanwa, Rosine Ingabire ushinzwe gutegura amarushanwa mu Ishyirahamwe rya Cricket mu Rwanda, yagize ati:”Ni ku nshuro ya kabiri iri gukinwa. Ryashyizweho mu rwego rwo kuzamura urwego rw’abakinnyi b’Abanyarwanda cyane ko bihuza n’abakinnyi bakomeye basanzwe bakinira izindi kipe z’Ibihugu”.
Yunzemo ati:”Rikinwa mu rwego rwo kongera imikino n’amarushanwa menshi abakinnyi bacu bitabira”.
Kuri uyu wa Gatatu, imikino irazakomeza Imena Herons icakirana n’Ingenzi Heroes guhera saa 09:30′, mu gihe Ingabo Knights yisobanura na Amasimbi Hawks guhera saa 13:30.
Iyi mikino ibera kuri Sitade mpuzamahanga ya Gahanga yubatse mu Karere ka Kicukiro mu Mujyi wa Kigali.
