Akanyamuneza n’Ibyishimo byari byasaze Abakinnyi b’Abanyarwanda nyuma yo kwitwara muri Marato Mpuzamahanga ya Kigali yitiriwe Amahoro.
Emmanuel Mutabazi na Emeline Imanizabayo, begukanye Umudali w’Umuringa (Bronze) buri umwe mu Ntera ya 1/2 cya Marato, waherekejwe n’akayabo k’Ibihumbi bitatu (3000$), ubwo kuri iki Cyumweru hakinwaga ku nshuro ya 19 iri Siganwa.
Abakinnyi 10, 183 bavuye mu bihugu 35 byo ku Migabane itandukanye ku Isi, bari bakereye iri Siganwa rikurura abatari bacye.
Mu Midali yari ihanzwe amaso, Abanyakenya begukanyemo 9 muri 12 yashobokaga, mu gihe u Rwanda rwatwayemo 2.
Mutabazi usanzwe ikinira Ikipe ya Polisi, yasoje Intera ya 1/2 cya Marato ari uwa gatatu, akoresheje 1:04:27.
Umudali wa Zahabu muri iki kiciro, wegukanywe n’Umunyakeya, Francis Langat wakoresheje 1:04:05, mu gihe Umuvandimwe we, Leonard Langat yatwaye Umudali wa Feza, akoresheje 1:04:24
Mu kiciro cy’abagore, Imanizabayo usanzwe ukinira Ikipe ya Sina Gerard, yegukanye Umudali w’Umuringa, akoresheje 1:14:20.
Umudali wa Zahabu wegukanywe na Winfridah Moraa Moseti wakoresheje 1:12:50, akurukirwa na Vivian Cheruiyot wakoresheje 1:14:01.
Intsinzi ya Moseti yo kuri iki Cyumweru, yabaye iya kabiri yikurikianya, kuko ni nawe wari wegukanye 1/2 cya Marato ya Kigali mu Mwaka ushize.
Mu Ntera ya 1/2 cya Marato, u Rwanda rwari rifitemo abakinnyi 7 mu kiciro cy’abagore n’abagabo baje mu 10 ba mbere, mu gihe muri Marato yuzuye, u Rwanda rwagize abakinnyi 2 baje mu 10 ba mbere, barimo Hitimana Noel wasoreje ku mwanya wa 5.
Ni mu gihe Umwaka ushize ubwo iri Rushanwa ryakinwaga ku nshuro ya 18, u Rwanda rwabonye igihembo kimwe, Umwanya wa 7 wegukanywe na Yankurije Marthe, mu bakinnyi 8 bahembwa.
Muri 1/2 cya Marato, uretse abegukanye Imidali, Jeanne Gentille yasoreje ku mwanya wa 4, Florance Niyonkuru aba uwa 6 mu gihe Angelique Ibishatse yegukanye umwanya wa 8.
Mu kiciro cy’abagabo, Felicien Muhitira yaje ku mwanya wa 5, mu gihe Victor Ingabire yabaye uwa 10.
Muri Marato, Noel Hitimana yabaye uwa 5, arushwa Iminota 2 n’Amasegonda 55 n’Umunyakenya Laban Korir wayegukanye akoresheje 2:16:06.
Ku ruhande rw’u Rwanda kandi, Alexis Nizeyimana yasoreje ku mwanya wa 6.
Mu Marato mu kiciro cy’abagore, nta Munyarwanda wigeze aza mu bakinnyi 10 ba mbere.
Marato yegukanywe n’Umunyakenyakazi, Joan Kipyatich wakoresheje 2:33:27, akurikirwwa n’Umunya-Etiyopikazi, Meseret Abebayehu wakoresheje 2:36:08, mu gihe Florence Chepsoi nawe ukomoka muri Kenya yakoresheje 2:39:34.
Ibihembo byatanzwe:
Marato
- 20,000$
- 15,000$
- 7,500$
- 5,000$
- 3,000$
- 2,000$
- 1,500$
- 1,000$
1/2 cya Marato
- 5,000$
- 4,000$
- 3,000$
- 2,000$
- 1,000$
- 800$
- 500$
- 400$
Iri Siganwa Mpuzamahanga rya Kigali ryitiriwe Amahoro, ritegurwa n’Ishyirahamwe ry’Imkino Ngororamubiri mu Rwanda (RAF), ku bufatanye na Minisiteri ya Siporo.
Guhera mu 2005, ryashyizweho hagamijwe kongera kwimakaza Ubumwe n’Ubwiyunge nyuma ya Jenoside yakorewe Abatutsi mu Rwanda mu 1994.
Amafoto
