Kuri uyu wa Gatandatu tariki ya 18 Gicurasi 2024, hasojwe imikino ya Kamarampaka (Play-Offs), yari imaze iminsi ibiri ikinirwa mu Nzu y’Imikino y’Ishuri rya Ecole Belge mu Mujyi wa Kigali.
Iyi mikino yasize Amakipe ya; Kepler VC, APR VC, Police WVC na APR WVC zigeze ku mukino wa nyuma.
Ikipe ya Kaminuza ya Kepler “Kepler VC”, yakatisha itike y’Umukino wa nyuma wa Shampiyona y’i 2024 nyuma yo gutsinda Ikipe ya Polisi y’Igihugu, amaseti 3-0 (32-30, 25-23,25-22).
Ni mu gihe kandi yari yayitsinze Umukino ubanza wakinwe tariki ya 17 Gicurasi 2024, amaseti 3-1.
Aya makipe yombi yasakiranye mu mikino ya Kamarampaka “Play-Offs”, ihuza amakipe 4 ya mbere yitwaye neza mu Mwaka usanzwe wa Shampiyona “Regular Season”.
Ku Mukino wa nyuma, Kepler VC izahura n’Ikipe y’Ingabo z’Igihugu “APR VC”, yahageze isezereye Ikipe y’Ikigo cy’Igihugu gishinzwe Ingufu (REG), “REG VC”, iyitsinze Umukino wa Kabiri amaseti 3-1 (25-18,27-29,25-19,25-16) nk’uko yari yabigenje Ejo hashize.
Mu kiciro cy’abagore, Ikipe y’Ingabo z’Igihugu (APR WVC), yageze ku mukino wa nyuma isezereye iy’Akarere ka Ruhango (Ruhango WVC) ku ntsinzi y’imikino 2-0, ni mu gihe Ikipe ya Polisi y’Igihugu (Police WVC) nayo yahageze isezereye Ikipe y’Ikigo cy’Igihugu gishinzwe Imisoro n’Amahoro (RRA WVC), ku ntsinzi y’imikino ibiri ku busa.
Mu mukino w’Umunsi wa kabiri, APR WVC yatsinze Ruhango WVC amaseti 3-0 (8-25, 14-25, 19-25), mu gihe ari nako Police WVC yabigenje imbere ya RRA WVC (24-26, 17-25, 23-25).
Imikino yo guhatanira umwanya wa gatatu, izahuza RRA WVC na Ruhango WVC mu bagore, mu gihe mu bagabo, REG VC izisobanura na Police VC.
Iyi mikino ya Kamarampaka “Play-Offs”, ikinwa Amakipe atanguranwa gutsinda imikino 3.
Iyo Ikipe itsinze indi imikino 2-0, Biba birangiye. Mu gihe zinganyije umukino 1-1, Hitabazwa umukino wa 3.
Mu Mwaka usanzwe wa Shampiyona, wari wasojwe Ikipe ya REG VC ari iya mbere, ukurikiwe na Police VC, Kepler VC na APR VC.
Umusaruro waranze Umunsi wa 1:
Abagore
⏺️APR VC 3-0 Ruhango VC: (25-16, 25-11, 25-15).
⏺️POLICE VC 3-2 RRA WC: (25-21, 18-25, 13-25, 25-22, 15-12).
Abagabo
⏺️REG VC 1-3 APR VC: (25-23, 20-25, 17-25, 27-29)
⏺️KEPLER VC 3-1 POLICE VC: (25-23, 22-25,30-28, 25-17).
Ntagihindutse, Umukino wa nyuma n’uwo guhatanira umwanya wa gatatu, izakinwa mu mpera z’iki Cyumweru gitaha.
Ni ku nshuro ya mbere Kepler VC na Police WVC zigeze ku mukino wa nyuma, mu gihe APR VC na WVC zihamenyereye.
APR VC yaherukaga kwegukana Igikombe cya Shampiyona mu 2020, mu gihe APR WVC yagitwaye mu Mwaka w’i 2022.
Umwaka ushize, Igikombe cyegukanywe n’Ikipe ya Gisagara VC mu bagabo, iyi ikaba itarashoboye kuza mu makipe ane ya mbere yakinnye Play-Offs y’uyu Mwaka, mu gihe mu bagore cyatwawe n’Ikipe ya RRA WVC yatsindiwe mu mikino ya kimwe cya kabiri.
Amafoto
