Impuzamashyirahamwe y’Umupira w’Amaguru muri Afurika y’Iburasirazuba no Hagati (CECAFA) yatangaje ko irushanwa rya CECAFA Kagame Cup 2023 ritakibaye kubera ko nta gihe gihagije cyo kuritegura.
Kuri uyu wa Mbere, Umuyobozi Mukuru wa CECAFA, Auka Gecheo, yavuze ko iri rushanwa rihuza amakipe meza mu karere ka Afurika y’Iburasirazuba no Hagati ryasubitswe kubera andi marushanwa menshi ya CAF na FIFA.
Ati “Ni amahirwe make ko nanone tutazabona iri rushanwa uyu mwaka. Twari dufite icyizere cyo kongera kuritegura kugira ngo dufashe amakipe yo mu karere kwitegura amarushanwa ya CAF azatangira mu kwezi gutaha.”
CECAFA Kagame Cup iheruka kuba mu 2021 aho yegukanywe na Express yo muri Uganda nyuma yo gutsinda igitego 1-0 Nyasa Big Bullets FC yo muri Malawi, yari yatumiwe muri iyo mikino yabereye i Dar es Salaam muri Tanzania.
Muri Mata, CECAFA yari yatangaje ko iri rushanwa rizakirwa na Sudani tariki ya 15-29 Nyakanga 2023.
Ku yandi marushanwa ategurwa na CECAFA, iry’Abatarengeje imyaka 23 ryagombaga kubera muri Ethiopia, ryimuriwe muri Mutarama umwaka utaha.
Tanzania izakira iry’Abagore batarengeje imyaka 18 guhera tariki ya 25 Nyakanga mu gihe imikino yo gushaka itike ya CAF Women Champions League izakirwa na Uganda tariki ya 12-30 Kanama.
CECAFA y’Abahungu batarengeje imyaka 15 izabera muri Uganda tariki ya 4-18 Ugushyingo, iy’Abatarengeje imyaka 18 ibere muri Kenya tariki ya 25 Ugushyingo- 9 Ukuboza.