Ikipe y’Igihugu y’u Rwanda yaraye ibonye intsinzi yayo ya kabiri mu mikino yo gushaka itike y’Igikombe cy’Afurika, mu makipe agize akarere ka 5 iri kubera i Dar es Salaam mu gihugu cya Tanzania.
Intsinzi y’amanota 72 kuri 55 imbere ya Sudani y’Epfo, yahaye u Rwanda ikizere ko rushobora kwerekeza muri Angola mu Kwezi gutaha.
Iyi ntsinzi kandi ije isanga iyo u Rwanda rwari rwabonye ku Cyumweru imbere ya Eritrea y’amanota 104-34.
Abakinnyi barangajwe imbere na Dick Sano Rutatika, Ntore Habimana na Steven Hagumintwari bakotanye bikomeye muri uyu mukino wakiniwe mu Nzu y’Imikino yitiriwe Nyakwigendera Benjamin Mkapa waboye Tanzaniya.
Uduce tubiri tw’uyu mukino twayobowe n’u Rwanda, aho aka mbere rwagatsinze ku manota 16-14, mu gihe aka kabiri rwagatsinze ku manota 21-09, mu gihe impande zombi zagiye kuruhuka u Rwanda rufite amanota 37-23 ya Sudani y’Epfo.
Amakipe avuye kuruhuka, agace ka gatatu katangiranye imbaraga ku mpande zombi, bitewe n’uko Sudani y’Epfo yashakaga kwishyura mu gihe u Rwanda rwari rurangamiye intsinzi.
Aka karangiye u Rwanda rukegukanye ku ntsinzi y’amanota 18 kuri 13, mu gihe Sudani y’Epfo yegukanye agace ka kane ku ntsinzi y’amanota 19 kuri 17. Gusa, aya manota ntabwo yari ahagije ngo rwegukane uyu mukino.
Muri uyu mukino, Rutatika, Habimana, Hagumintwari Dieudonné Ndizeye buri umwe yatsinzemo amanota 11, mu gihe Jean-Jacques Wilson Nshobozwabyosenumukiza yatsinzemo amanota 08.
Kuri uyu wa Kabiri, u Rwanda ruragaruka mu Kibuga rucakirana n’ikipe y’Igihugu ya Tanzaniya.
