Mu gihe u Rwanda rukiri mu minsi 100 yo Kwibuka ku nshuro ya 29 Jenoside yakorewe Abatutsi mu 1994, Ingaga z’Imikino zitandukanye ziri gukina imikino yo kwibuka Abatutsi bishwe muri Jenoside by’umwihariko Abasiporotifu.
Aha, ni ho Ishyirahamwe ry’Imikino y’abakozi mu Rwanda (ARPST) nk’umunyamuryango wa Komite Olempike y’u Rwanda, yunze mu ry’andi mashyirahamwe 18 ya Siporo atandukanye yateguye iyi mikino.
Ubwo iyi mikino yasozwaga kuri iki Cyumweru tariki ya 04 Kamena 2023, Umunyamabanga mukuru wa ARPST, Rwabuhihi Innocent yabwiye Itangazamakuru ko bishimira uko irushanwa ryagenze, yungamo agira ati:
Tugiye kongera imbaraga mu gukangurira Ibigo by’abakozi kwitabira iyi mikino.
Agaruka kuri birantega bahuye nazo uyu Mwaka, Bwana Rwabuhihi yagize ati:”Twari twatumiye iki yo muri Kenya kwifatanya natwe mu Mikino yo Kwibuka, ariko abakinnyi bagirira ibibazo mu nzira bituma batagerera i Kigali ku gihe. Iyo iyi kipe iza, yari kongera uburyohe bw’iyi mikino. Gusa, turizera ko umwaka utaha bizagenda neza kurushaho”.
Ubwo hasozwaga imikino y’irushanwa ryo Kwibuka ku nshuro ya 29 Jenoside yakorewe Abatutsi mu 1994, ikipe y’umupira w’amaguru ya Sosiyete y’u Rwanda ikora ubwikorezi bw’abantu n’ibintu mu kirere, RwandAir n’iy’abakobwa y’Ikigo gishinzwe Ingufu n’amashanyarazi, REG, ni zo zahize izindi.
Ni irushanwa ryatangiye ku wa Gatanu tariki 2 Kamena, risozwa ku Cyumweru tariki 4 uku kwezi. Mu mupira w’amaguru, amakipe 10 ni yo yagombaga gukina mu gihe mu bagore hagombaga gukinwa Basketball ariko igakinwa n’amakipe ane y’abagore.
Muri ruhago, hari hatumiwe BK, Rwandair, Ubumwe Grande Hotel, Eawassca (Kenya) na RBC, mu gihe muri Basketball (abagore) hari hitabiriye RSSB, REG, UR na CoK.
Mu mupira w’amaguru, Rwandair FC itaherukaga igikombe icyo ari cyose, ni yo yegukanye igikombe itsinze Ikigo cy’Igihugu cy’Ibarurishamibare (NISR) kuri penaliti 4-2 nyuma yo kunganya ibitego 2-2 mu minota 90. Ikipe ya RBC yabonye umwanya wa Gatatu nyuma yo gutera mpaga Eawassca FC yo muri Kenya.
Muri Basketball, ikipe ya REG ni yo yegukanye igikombe itsindiye RSSB ku mukino wa nyuma. Muri iki cyiciro, UR yabaye iya Gatatu. Hahembwe kandi ikipe eshatu za mbere muri buri cyiciro.
Biteganyijwe ko Shampiyona y’abakozi, izangira muri Nyakanga uyu mwaka.
