Umwaka wa Shampiyona y’Igihugu y’umukino wa Volleyball ikinwa n’abantu bafite Ubumuga ‘Sitball’ w’i 2022/23, ugiye gushyirwaho akadomo, nyuma y’uko witabiriwe n’amakipe 20, arimo 10 mu bagore no mu bagabo. Ugiye gusozwa nyuma y’uko uzengurutse ibice binyuranye by’Igihugu, ukaba uzasorezwa mu Karere ka Nyarugenge tariki ya 01 Mata 2023.
Iyi shampiyona itegurwa na Komite y’Igihugu y’abantu bafite ubumuga (NPC), amakipe azakina imikino yayo ya nyuma yakuye itike mu Karere ka Bugesera mu mpera z’Icyumweru gishize.
Ikipe ihagarariye Akarere ka Musanze mu bagabo n’abagore, ni imwe mu zo guhanga amaso, nyuma yo kwerekana urwego rudasanzwe mu mikino y’amajonjora.
By’umwihariko, ikipe y’abagore ifite agahigo ko kuba kugeza ubu itaratsindwa umukino n’umwe, kuko imikino 9 yose yakinnye yayegukanye.
Uretse Musanze, andi makipe y’abagore azahatana nayo harimo ‘Rutsiro,Karongi, Rulindo na Gisagara.
Mu gihe mu kiciro cy’abagabo, ikipe y’Akarere ka Musanze naho iyoboye, kuko yibitseho amanota 23 ikesha gutsinda imikino 7, igatakaza 2 mu mikino 9 yakinnye.
Iza ku mwanya wa mbere imbere ya Rutsiro irusha ikinyuranyo cy’igitego kimwe gusa, mu gihe zikurikirwa na Karongi, Rulindo ndetse na Gisagara.
Tariki ya 01 Mata 2023, yaba mu kiciro cy’abagore n’abagabo, amakipe uko ari 5 muri buri kiciro azagenda ahura hagati yayo, nyuma habarwe iyatsinze imikino myinshi ariyo yegukana igikombe cya Shampiyona.
Amafoto
