Kuri uyu wa Kane tariki ya 3 Nzeri, Perezida wa Repubulika y’u Rwanda, Paul Kagame yafunguye ku mugaragaro uruganda rwa Anjia Prefabricated Construction Rwanda Company Ltd rukora sima n’ibindi bikoresho by’ubwubatsi ruherereye mu cyanya cy’inganda cyo mu Karere ka Muhanga mu Ntara y’Amajyepfo y’Igihugu.
Ubwo yatahaga uru ruganda, Perezida Kagame yari ari kumwe n’abanyacyubahiro batandukanye barimo Hailemariam Desalegn wabaye Minisitiri w’Intebe wa Ethiopia.
Uru ruganda rwubatse ku buso bwa hegitari 67, rufite ubushobozi bwo gutunganya imifuka milioni makumyabiri buri mwaka.
Kuri ubu uru ruganda rukoresha abakozi 205 barimo 185 b’Abanyarwanda n’abandi 20 b’abanyamahanga.
Biteganyijwe ko mu mpera z’uyu mwaka aba bakozi bazaba biyongereye kugera kuri 250.
Amakuru avuga ko uru ruganda ruzajya rukoresha amatsinda atatu y’abakozi basimburana mu masaha 24 agize umunsi ubwo ruzaba rukora ijana ku ijana mu rwego rwo gutanga umusaruro ukwiriye.
Amafoto
