Imyaka 11 yari ishize ikipe y’Ingabo z’u Rwanda, APR FC ikoresha abakinnyi b’Abanyarwanda gusa.
Abakunzi bayo ndetse n’aba ruhago mu Rwanda bakuze kuyishinja ko ibyo ikora bidasanzwe, kuko umupira w’amaguru ubusanzwe utagira Ubwenegihugu cyangwa udakinirwa ku Ndangamuntu.
Ni mu gihe nyamara aba bakinnyi yakoresheje muri iyi myaka 11 ishize, uretse kwegukana ibikombe by’imbere mu gihugu, ku rwego rw’Akarere n’Umugabane w’Afurika muri rusange yakubitiwe ahareba inzega.
Mu gihe ubwo yakoreshaga abakinnyi barimo n’Abanyamahanga yari ikipe ikanganye haba mu Karere no muri Afurika muri rusange.
Ikoresha aba bakinnyi, yegukanye ibikombe bitatu bya CECAFA (2004, 2007 na 2010).
Muri Afurika, yakinnye imikino ya 1/2 cy’Amakipe yatwaye ibikombe iwayo, gusa ntabwo yakinnye umukino wa nyuma kuko yasezerewe na Julius Berger yo muri Nijeriya mu 2003.
Uyu musaruro niwo wakomeje gukorogoshora abakunzi b’iyi kipe bita Nyamukandagira, bityo bakifuza ko ubuyobozi bwayo bwakongera kubashimisha.
Byatwaye imyaka itari mike bivugwa, ariko gushyirwa mu ngiro bikagorana.
Gusa, kuri iyi nshuro, ubuyobozi bushya buyobowe na Lt Col Richard Karasira bwashyize mu ngiro ibyifuzo by’abakunzi b’iyi kipe.
Ku ikubitiro, bwerekeje amaso mu Karere no ku ruhando rw’Afurika.
Muri iyi nkuru, THEUPDATE igiye kurebera hamwe abakinnyi batungwa agatoki mu kwinjira mu muryango wa APR FC.
- Taddeo Lwanga (Uganda)
Lwanga ni umukinnyi mpuzamahanga w’Umugande, ufite imyaka 29. Kuri ubu, akina mu ikipe ya AS Arta Solar mu gihugu cya Djibouti
Mu myaka ibiri yamaze muri SIMBA SC yo mu gihugu cya Tanzaniya, uyu mukinnyi ukina mu kibuga hagati, ni umwe mu bagiranye nayo ibihe byize, ndetse bakinana nayo imikino ya 1/4 cya CAF Champions League.
Radiyo Fine FM ikorera i Kigali mu Rwanda, yatangaje ko uyu mukinnyi ari i Kigali, aho yaje mu biganiro bya nyuma bimwinjiza muri iyi kipe y’Ingabo z’u Rwanda.
Mu gihe yaramuka ashyize umukono ku masezerano, ni umwe mu bakinnyi bitezweho kuyigeza kuri byinshi ku ruhando rw’Afurika, mu gihe yaramuka akiri ku rwego nk’urwo yahozeho akiri muri SIMBA SC.
- Ismail Nshimirimana Pitchou (Burundi)
Uyu mukinnyi mpuzamahanga w’Umurundi, ni umwe mu bakinnyi bari bamaze imyaka isaga ibiri ho gato akina muri Shampiyona y’u Rwanda.
Ni umwe mu bakinni bafatwa nk’abayiranze muri uyu mwaka ushize 2022/23 mu bakina hagati mu kibuga.
Imbere mu gihugu, batunguwe no kubona Kiyovu Sports yakiniraga imurekuye nyamara yari umwe mu bakinnyi bari bayifatiye runini hagati mu kibuga, ndetse rimwe na rimwe ikamwitabaza nk’umukinnyi uyifasha yugarira.
Amakuru THEUPDATE ifite, arahamya ko APR FC ishaka kumusimbuza Mugisha Bonheur bivugwa ko ari mu muryango werekeza muri Stade Tunisien yo mu gihugu cya Tuniziya.
Ubuhanga bwe hagati mu kibuga, ni kimwe mu byo APR FC ikeneye mu gihe yaba yifuza kwitwara neza ku ruhando rw’Afurika.
- Babatunde Adebare Adepoju (Nigeria)
Ni rutahizamu mpuzamahanga w’Umunyanijeriya wavuze tariki ya 21 Ugushyingo mu 1995.
Kuri ubu, akinira ikipe ya Venda FC ikina mu kiciro cya mbere muri Shampiyona ya Afurika y’Epfo.
Amakuru THEUPDATE ifite, ni uko nawe ari umwe mu bakinnyi banugwanugwa kwinjira muri APR FC.
Ku myaka 27, uyu rutahizamu yanyuze mu makipe arimo Mighty Wanderers na Nyasa Big Bullets zo mu gihugu cya Malawi.
- Ngweni Ndasi (Cameroon)
Ngwni ni rutahizamu mpuzamahanga ukomoka mu gihugu cya Kameroni. Uyu mugabo yavutse tariki 15 Kamena 1991.
Amakuru THEUPDATE ikesha Radiyo FINE FM, avuga ko uyu mukinnyi yamaze kugezwaho urupapuro rumutumira muri APR FC, mu gihe yaramuka aruhaye umugisha, akaba yaza guhita akora ikizamini cy’ubuzima kimwinjiza muri iyi kipe y’ikipe y’Ingabo z’u Rwanda.
Mu gihe yaramuka atsinze iki kizamini, akaba yahita ashyira umukono mu masezerano y’imyaka 2.
Ngweni Ndasi, amaze gukinira ikipe y’Igihugu ya Kameroni imikino 4, akaba amaze kuyitsindira igitego 1.
Uretse gukinira ikipe ya Rivers United FC guhera mu 2021, yakiniye andi makipe arimo Union Douala yo muri Kameroni na Kano Pillars yo muri Nijeriya.
Aramutse ashyize umukono ku masezerano, ni umwe mu bakinnyi bitezweho gufasha APR FC kuyigeza mu mikino y’Amatsinda ya CAF Champions League nk’uko abakunzi bayo bahora babirota.
- Ndzila Pavelh (Congo Brazzaville)
Ndzila ni umunyezamu mpuzamahanga ukomoka mu gihugu cya Congo Brazzaville.
Ni umunyezamu nimero ya mbere mu ikipe y’Igihugu ya Congo Brazzaville, izwi nk’amashitani atukura.
Ku myaka 28,
Ubunararibonye bwe ntagushidikanya ko buzahita bumuhesha kuba umunyezamu nimero ya mbere muri APR FC mu gihe yaramuka ayisinyiye.
Gusinya kwe, kuzahita gushyira ku ntebe y’abasimbura Ishimwe Pierre wari umunyezamu wa mbere muri iyi kipe y’Ingabo z’u Rwanda.
Mu mikino 14 amaze gukina mu marushanwa ny’Afurika, yatsinzwe ibitego 21, amara imikino 4 atinjijwe igitego.
Amaze kandi gukinira ikipe y’Igihugu ya Congo Brazzaville imikino 17, aho muri yo harimo kuba yarakiniye iyi kipe mu mikino ya nyuma y’Igikombe cy’Afurika (AFCON) cyo mu 2015 cyakiniwe mu gihugu cya Equatorial Guinea.