Ikipe y’Igihugu y’u Rwanda y’umukino wa Handabll mu kiciro cy’abatarengeje imyaka 19, imaze Icyumweru mu gihugu cya Esipanye mu Mujyi wa Madrid, aho irimbanyirije imyitozo yitegura Igikombe cy’Isi kizabera mu gihugu cya Croatia guhera tariki ya 02 Kanama (8) 2023.Bit
Iyi kipe y’Igihugu ikora imyitozo kabiri ku munsi (10:00-12:00 na 18:00-20:00) mu rwego rwo gukomeza kuyongerera imbaraga.
Muri iyi myitozo, abakinnyi berekwe amashusho y’imikino itandukanye ndetse bakanayijora mu rwego rwo kwiga uko andi makipe akina.
Agaruka kuri iyi myitozo, Umutoza w’ikipe y’Igihugu Bagirishya Anaclet yagize ati:”Iminsi tumaze i Burayi imaze gufasha abakinnyi kumenyera umwuka waho ku buryo tutazagorwa no muri Croatia. Ku kijyanye n’ibibuga, ibiri hano mu Mujyi wa Madrid ntaho bitandukaniye n’ibyo tuzakiniraho. Ibi birafasha abakinnyi kuzajya mu irushanwa nta gihunga”.
“Bitewe n’ibibazo bitandukanye birimo ibyangombwa twatinze kubona ngo tugerere muri Esipanye igihe, ntago umukino wa gicuti twari guhuramo n’iki gihugu washobotse ndetse n’uwa Maroke kubera ikibazo cy’ingendo z’Indege ntago byakunze. Kuri ubu, turi kwitegura niba biramutse bishobotse hari uwo twabona tugeze muri Croatia mbere y’uko twinjira mu irushanwa ku wa Gatatu utaha”.
“Gukina na Esipanye nk’ikipe ifite igikombe cy’Uburayi natwe dufite umwanya wa kabiri muri Afurika byai budufashe kwipima neza, gusa ntago byakunze. Imikino twakinnye n’Uburundi ndetse n’ikipe ya Police, tuzayifashisha nk’impamba izadufasha kwitwara neza muri iyi mikino”.
U Rwanda ruri mu itsinda rya mbere (Group A) rusangiye na Portugal, Croatia na Algeria. Imikino y’iri tsinda izabera mu Mujyi wa Varazdin.
Ruzakina umukino ufungura irushanwa tariki ya 02 Kanama 2023, umukino ruzacakiranamo na Portugal.
Gahunda y’imikino y’u Rwanda
- Tariki 02/08/ 2023: Portugal vs Rwanda (13:00 ku isaha ya Kigali)
- Tariki 04/08/2023: Croatia vs Rwanda (19:30 ku isaha ya Kigali)
- Tariki 05/08/2023 Rwanda vs Algeria (15:30 ku isaha ya Kigali)
