Hagati ya tariki 26 na 28 Mata 2024, u Rwanda rwakiriye Inama Mpuzamahanga y’Impuzamashyirahamwe y’Umukino wa Cricket muri Afurika “ICC Africa Regional Conference”, yabereye ku Ubumwe Grand Hotel.
Yafunguwe n’Umunyamabanga uhoraho muri Minisiteri ya Siporo, Bwana Niyonkuru Zephanie.
Yitabiriwe n’intumwa y’Impuzamashyirahamwe y’Umukino wa Cricket ku Isi ushinzwe iterambere ry’uyu Mukino muri Afurika, Patricia Kambarami, Uhagarariye Komite Olempike ku rwego rw’Isi, Madame Rwemalika Felicite, Komite Olempike ku rwego rw’Afurika, abayobozi b’Amashyirahamwe y’Umukino wa Cricket n’abandi..
Iyi nama yakiriwe n’u Rwanda ku nshuro ya mbere, yitabiriwe n’Ibihugu bikabakaba 20 birimo: Cameroon, Cote d’Ivoire, Eswatini, Ghana, Kenya, Lesotho, Mali, Malawi, Mozambique, Namibia, Nigeria, Seychelles, Sierra Leone, South Africa, St. Helena, Tanzania, Botswana, Uganda, Zimbabwe n’u Rwanda.
Bimwe mu byagarutseho muri iyi nama, harimo kurebera hamwe uruhare rw’Impuzamashyirahamwe y’Umukino wa Cricket ku Isi mu gufasha Ibihugu by’Afurika gutera imbere ndetse n’imbaraga zashyirwa mu gukomeza kugeza uyu mukino kuri bose.
Kugira ngo ibi bigerweho, abitabiriye iyi nama biyemeje gukora ibishoboka byose uyu mukino ukaganwa n’abaterankunga, kuko utatera imbere uru rwego rutabigizemo uruhare.
Hari kandi gukora n’Inzego bwite za Leta ibi bihugu bibarizwamo, hagamijwe kugeza Umukino wa Cricket ku rwego mpuzamahanga. Ibi kandi, abitabiriye iyi Nama bifuje ko byagirwamo uruhare n’Ikigega Olempike.
Ntabwo ari ukugeza Cricket ku rwego mpuzamahanga binyuze mu miyoborere myiza gusa, ahubwo harimo by’umwihariko no kwitwara neza mu Kibuga.
Mu kiganiro n’Intangazamakuru nyuma y’iyi Nama, Umuyobozi w’Ishyirahamwe ry’Umukino wa Cricket mu Rwanda, Stephen Musaale yagize ati:“Kwakira Inama nk’iyi ku gihugu cyacu bivuze byinshi. Bitwereka ko uruhare Igihugu kigira mu guteza imbere Siporo, rubonwa n’Amahanga”.
Yunzemo ati:“Mu rwego rw’Ubukungu, abitabiriye iyi Nama bazinjiriza Igihugu, ibi bikaba bizafasha mu rugendo rw’Iterambere, by’umwihariko Umukino wa Cricket ubigizemo uruhare”.
“Ngarutse ku cyo kwitega kubijyanye na Cricket, twe nk’Ishyirahamwe ry’Umukino wa Cricket mu Rwanda, iyi Nama izadufasha gukomeza kureba ahari ibitaranozwa hagamijwe ejo hazaza h’uyu Mukino”.
“Bimwe mu by’ibanze, harimo gushakira abakinnyi imikino ihagije binyuze mu Marushanwa twemeranyijwe gushyirwaho, hari gushyira za Shampiyona mu Bigo by’Amashuri by’umwihariko hakibarwa ku bakiri bato”.
Bwana Musaale yasoje agira ati:“Turashimira Impuzamashyirahamwe y’Umukino wa Cricket muri Afurika (ICC Africa) kuba yarahisemo Igihugu cyacu ngo cyakire iyi Nama. Turizeza ko tuzakomeza gufungurira Amarembo abatugana mu rwego rwo kubaka Igihugu cyacu”.
Amafoto
