Ku wa kabiri w’iki Cyumweru, Komisiyo y’amatora mu Ishyirahamwe rya ruhago mu Rwanda, FERWAFA, yatangaje urutonde rw’abakandida bemerewe kwiyamamariza kuyiyobora mu matora ateganyijwe tariki 24 Kamena 2023.
Ni amatora yateguwe nyuma y’uko Komite nyobozi ya FERWAFA isheshwe nyuma yo kwegura kw’abari bayigize babimburiwe na Nizeyimana Mugabo Olivier wayiyoboraga.
Mu rutonde rwatangajwe, Munyantwali Alphonse uyobora ikipe ya Police FC ni we mukandida rukumbi ku mwanya wa Perezida.
Mu batemerewe kwiyamamaza harimo Gacinya Denis wigeze kuyobora Rayon Sports, akaba yari yatanze kandidatire ku mwanya wa Visi-Perezida.
Abandi batemerewe barimo Murangwa Eugene uyobora Ishyirahamwe ry’abahoze bakinira Amavubi, Hakizimana Moussa wiyamamaje nka Komiseri ushinzwe ubuvuzi, akaba yarigeze no kuba muri Komite nyobozi ya FERWAFA ndetse aba n’Umuganga w’Amavubi mu gihe kirekire.
Abayita Aremewe ihanganye na Ntiyemewe, bashyingira ku nyandiko yashyizwe hanze na Ferwafa ubwayo, igaragaza abakandida ku myanya itandukanye.
Uwagaragajwe nk’uwujuje ibisabwa, banditseho ijambo ‘Iramewe’, mu gihe uwo bagaragaje ko afite birantega, banditseho ijambo ‘Ntiyemewe’.
N’ubwo bimeze bitya, abakurukiranira aya matora hafi, bibaza icyazitira bamwe muri aba bantu twagarutseho haruguru, mu gihe amateka ya ruhago mu gihugu imbere yerekana ko bayagizemo uruhare mu bihe bitandukanye.
Duhereye kuri Gacinya Chance Denis, wayoboye Rayon Sports ubwo yari mu bihe byayo byiza ku ruhando ny’Afurika mu mwaka w’i 2018-2019, hibazwa icyamubuza kwiyamamaza.
Amakuru THEUPDATE yamenye, ni uko ngo yaba atarabonye ibaruwa ivuye mu buyobozi bw’iyi kipe, buvuga ko buhamya ko yayiyoboye kandi bumutanzeho umukandida.
Gusa, nyuma y’uko abwiwe ko hari ibyo atujuje, kuri uyu wa Gatatu hagiye hanze ibaruwa THEUPDATE ifitiye kopi, igaragaza ko ikipe ya Akagera FC ikorera mu Karere ka Kayonza i Rwankwavu, yemeye kumutangaho umukandida.
Ni mu gihe Ferwafa yari yatanza amasaha 48 y’ubujurire ku cyemezo cyo kutemererwa kwiyamamaza.
Turetse Aremewe vs Ntiyemewe, abayita Ikinamico bashingira ku kuba umwanya wa Perezida uriho umuntu umwe rukumbi, uyu kandi akaba yaratangiye kunugwanugwa ubwo yagirwaga umuyobozi wa Police FC mu buryo butunguranye.
Munyentwali Alphonse wayoboye Akarere ka Nyamagabe, Intara y’Amajyepfo n’iy’Uburengerazuba, uretse kuba ubwo yari Meya yarafashije Amagaju FC kongera kuyagarura mu kiiciro cya mbere, nta bindi bidasanzwe azwiho muri ruhago.
Bikimara gutangazwa ko yahawe inshingano zo kuyobora Police FC, abatari bacye bahise batangira guhamya ko ari inzira imwicaza ku buyobozi bwa Ferwafa, none bidatinze irisa n’iryavuzwe ryaba rigiye gusohora kuko ariwe mukandida rukumbi kuri uyu mwanya.
