Jurgen Klopp ari kunugwanugwa nk’umusimbura wa Carlo Ancelotti ku kazi ko gutoza Real Madrid.
Mu bihe bitandukanye, nyuma yo gusezera muri Liverpool, Klopp yivugiye ko amakipe yamugarura mu kazi arimo iyi Real Madrid biri gushyirwa mu majywi ko ashobora kuyijyamo, ndetse n’Ikipe y’Igihugu ya Brazil.
Amakuru yo gusimbura Ancelotti, yatangiyee gusakara nyuma y’uko Real Madrid isezerewe na Arsenal mu mikino ya ¼ cya UEFA Champions League.
Muri iyi mikino, Arsenal yatsinze Real Madrid ibitego 5-1 mu mikino yombi. Mu mukino ubanaza, Real Madrid yawutsinzwemo ibitego 3-0, mu gihe uwo kwishyura yawutsindiwe mu rugo ibitego 2-1.
Uku kwandagazwa, kwanditse amateka mabi kuri Ancelotti, wari umaze imyaka 21 ataza uko gusezererwa mu mukino ya ¼ bimera.
Nyuma yo gusezererwa, Klopp yahise atangira gushyirwa mu majwi nk’umusimbura mwiza wa Ancelotti, cyane ko ari umwe mu batoza bakomeye bari ku Isoko.
Mu Mpeshyi y’Umwaka ushize, nibwo Jurgen Klopp yasezeraga ku kazi ko gutoza Liverpool nyuma y’Imyaka ikabakaba 10.
Muri iki gihe cy’Imyaka hafi 10, yafashije Liverpool kwegukana Igikombe cya Shampiyona yari imaze imyaka 30 yirukaho ndetse n’icya UEFA Champoins League yaherukaga mu 2005.
Gusezererwa muri ¼ cya UEFA Champoins League, gukurwa ku mwanya wa mbere muri Shampiyona, kunyagirwa na FC Barcelona by’umwihariko mu mukino w’Igikombe kiruta ibindi muri Esipanye [Spanish Super Cup], byibagije abakunzi ba Real Madrid ibihe byiza babanyemo na Ancelotti, batangira kumusabira guhambirizwa.
Ntabwo ari ubwa mbere bivugwa ko Ancelotti ashobora guhambirizwa, cyane ko na mbere y’uko uyu mwaka w’imikino utangira, byavugwaga ko ashobora gutandukana na Real Madrid, akerekeza mu kazi ko gutoza Ikipe y’Igihugu ya Brazil [Samba Boys].
Uretse Jurgen Klopp, undi mutoza ushyirwa mu majwi mu gihe byaba byanze, ni Xabi Alonso, umwe mu banyabigwi ba Real Madrid, kuri ubu utoza Ikipe ya Bayern Leverkusen.
Muri Bayern Leverkusen, Alonso yegukanyemo Shampiyona y’Ubudage yatwaye adatsinzwe umukino n’umwe, ndetse anayigeza ku mukino wa nyuma wa UEFA Europa League. Gusa, aha yatsinzwe na Atalanta ibitego 3-0.
Bayern Leverkusen ivuga ko niba Rela Madrid yifuza Alonso, igomba kurekura Miliyoni 10 z’Amayero, ikagura amasezerano ye. Aya masezerano agaragaza ko azarangira mu 2026.
Undi ushyirwa mu majwi ko yatoza Real Madrid, ni Umufaransa, Zinedine Zidane. Mu gihe yaramuka ayigarutsemo, yaba ari inshuro ya gatatu.
Ubwo ahaheruka, yegukanyeyo ibikombe bitatu byikurikiranya bya UEFA Champions League [2015-16, 2016-17 na 2017-18].
N’ubwo hari inkundura yo kumenya umusimbura wa Ancelotti ushobora kwerekwa Umuryango usohoka ntagihindutse ubwo uyu Mwaka w’imikino uzaba urangiye, iyi kipe yugarijwe n’imvune z’abakinnyi bayo bakomeye.
Bigaragazwa no kuba ishaka kurema isoko ryo mu Mpeshyi mu buryo bukomeye.
Kugira ngo izibe ibyuho bikomeje kuyugariza by’umwihariko m’ubwugarizi, myugariro w’Umwongereza Trent Alexender Arnold ukina inyuma ku ruhande rw’iburyo, n’umwe mu bari gushyirwa mu majwi.
Nyuma yo gusezererwa muri UEFA Champions League no kuba irushwa amanota 4 na FC Barcelona iyoboye Shampiyona, Real Madrid isigaje amahirwe amwe gusa yo kwegukana Igikombe muri uyu mwaka w’imikino.
Ifite umukino wa nyuma w’Igikombe cy’Umwami [Copa Dey Lay], uzayihuza na FC Barcelona tariki 26 Mata 2025.
