Ikigo cy’Igihugu gishinzwe Ubuzima, RBC, cyatangaje ko umwaka ushize wa 2024 abantu bagera ku 3000 bahitanywe na kanseri z’ubwoko bunyuranye.
Bamwe mu bayirwaye bakayikira barishimira ko mu Rwanda ubuvuzi bwa Cancer bugenda butera imbere, bakagira inama buri wese kujya yisuzumisha kugira ngo bamenye uko bahagaze kuko bituma bavurwa hakiri kare bikabongerera amahirwe yo gukira.
Umutesi Liliane ni umubyeyi w’abana 2 wakize indwara ya Cancer y’ibere.
Avuga ko agifatwa hari mu 2022 ubwo yonsaga umwana we wari ufite imyaka 2, ariko ntiyahita amenya ko ari Cancer, ndetse agana abavuzi batandukanye barimo n’abagakondo ariko batinda gutahura indwara yari arwaye.
Umutesi akomeza avuga ko yaje kumenya ko ari Cancer imaze kugera ku rwego rwa kane, aho biba bigoye ko ivurwa igakira.
Nyuma kubyakira byaramugoye ariko yirinda kwiheba cyane, ndetse n’umuryango we umuba hafi.
Umuyobozi ushinzwe indwara zitandura zirimo na Cancer, muri RBC, Dr Uwinkindi François avuga ko bishimira ko mu Rwanda ubuvuzi bwa Cancer bugenda butera imbere aho ubu kuyisuzuma bishoboka, ndetse no kuyivura hakoreshejwe uburyo butandukanye.
Buri taliki 4 Gashyantare ni umunsi mpuzamahanga wo kurwanya indwara ya Cancer.
Ishami ry’Umuryango w’Abibumbye ryita ku Buzima, OMS rivuga ko umubare w’abo ihitana ukomeje kwiyongera kuko mu 2022 abantu million 20 bayanduye, naho abagera kuri million 10 bahitanywe nayo.
Mu Rwanda ho RBC ivuga ko umwaka ushize wa 2024 abantu 5500 basanze barwaye Cancer, abagera 3000 irabahitana.
Cancer zikunze guhitana abantu mu Rwanda iza kumwanya wa mbere ni Cancer y’ibere, igakurikirwa na Cancer y’inkondo y’umura, iya gatatu ikaba cancer ya prostate, ku mwanya wa kane haza Cancer zifata amara, igifu n’umwijima. (RBA)