Abanyamuryango b’Ishyirahamwe rya Basketball mu Rwanda, Ferwaba, bemeje tariki ya 24 Mutarama 2025, nk’itariki y’itangira rya shampiyona.
Babyemereje mu nama y’Inteko rusange ngaruka mwaka yateraniye kuri Park Inn by Radisson Kigali Hotel mu Mujyi wa Kigali, kuri uyu wa 16 Ugushyingo 2024.
Kugeza ubu, abakinnyi bari mu kirihuko nyuma yo gusoza Shampiyona yasojwe muri Nzeri (9) yegukanywe na APR BBC ihigitse Patriots BBC ku ntsinzi y’imikino 4-2, mu kiciro cy’abagabo, mu gihe mu cy’abagore bagitangiye mu Ukwakira (10).
Igikombe cya Sha,mpiyona mu bagore cyegukanywa na REG WBBC itsinze APR WBBC ku mukino wa nyuma.
Muri iyi nama y’Inteko rusange, abanyamuryango bemeje amakipe ya; Azomco WBBC yahise yakirwa mu kiciro cya mbere cy’abagore, mu gihe Christian BBC na Kigali Elite BBC zizakina mu cya kabiri mu bagabo.
Mu kiciro cya mbere mu bagabo kandi, Flame Basketball Club na Azomco BBC nabo bazaba bari mu makipe azakina Umwaka w’i 2025.
Flame Basketball Club yabonye itike yo kuzamuka mu kiciro cya mbere nyamara yari yasoreje ku mwanya wa gatatu muri Shampiyona y’icya kabiri.
Iyi tike iyikesha kuba Ikipe ya Keplerians yari yabaye iya kabiri binayihesha itike yo kuzamuka mu cya mbere, itabyemerewe kuko ari ishamikiye kuri Kaminuza ya Kepler, iyi ikaba inasanganywe ikipe mu kiciro cya mbere, Kepler Basketball Club.
Yashingiwe ku mategeko, ntabwo Ikigo kimwe cyagira amakipe abiri muri Shampiyona.
Amafoto
