Abagenzi bakoresha umuhanda Huye- Nyanza-Busoro-Bugesera baravuga ko kuva imirimo yo gushyira kaburimbo mu muhanda wa Nyanza-Busoro-Bugesera yatangira byoroheje ingendo, ndetse n’amafaranga bakoreshaga mu ngendo yaragabanutse ugereranyije na mbere bakinyura mu Mujyi wa Kigali kugira ngo bagere mu Bugesera.
Abagenzi bava muri gare ya Huye berekeza mu Karere ka Bugesera mu Ntara y’Iburasirazuba, hashize amezi agera kuri 4 babonye imodoka ya City Express ibajyana batarinze kunyura i Kigali nk’uko byari bisanzwe.
Ku batuye muri santire ya Busoro bo ngo kuva kaburimbo yagera muri uyu muhanda wa Nyanza-Busoro-Bugesera habarizwa agency 2 ziva aha Busoro zerekeza mu Karere ka Bugesera ndetse no mu Mujyi wa Kigali. Barasaba ahubwo ko imodoko zibahuza na Nyanza na Huye nazo zakwiyongera.
Gusa, abafite imodoko zikorera muri uyu muhanda wa Huye-Nyanza-Busoro-Bugesera bagaragaza ko kuba imodoka zikiri nke, ngo biterwa nuko hari igice cy’uyu muhanda kaburimbo itarageramo.
Igice cy’uyu muhanda wa Nyanza-Busoro-Bugesera kitarajyamo kaburimo ni igice cya Gasoro ugaruka ku muhanda munini Kigali-Huye-Nyanza, naho kuva Busoro werekeza Bugesera hose kaburimbo yagezemo. (RBA)