Guhera tariki ya 2 kugeza ku ya 6 Ugushyingo 2024, i Addis Ababa muri Ethiopia hazakinirwa imikino y’Igikome cy’Afurika cy’Ingimbi zitarengeje Imyaka 20.
Ingimbi z’u Rwanda zizakina umukino ufungura iri rushanwa zesurana n’iza Congo Brazzaville.
Ibi bihugu byombi bisangiye itsinda rya mbere na; Guinea, Zimbabwe n’Ibirwa bya Réunion.
Nyuma yo kwegukana irushanwa ry’Akarere ka gatanu muri Gicurasi (5) y’uyu Mwaka itsinze Uganda ibitego 26-25, iyi kipe y’Umutoza Francois Xavier Ngarambe, ihanzwe amaso n’abakunzi b’Umukino wa Handball mu Rwanda, bategereje kureba ko n’iki gikombe izakibikaho.
Tariki ya 29 Ukwakira 2024, Impuzamashyirahamwe y’umukino wa Handball muri Afurika, yatangaje ingengabihe y’iri rushanwa.
Iyi igaragaza ko nyuma yo gukina na Congo Brazzaville, tariki ya 3 ruzisobanura na Guinea, tariki ya 4 rukine na Zimbabwe mu gihe ku ya 6 ruzasoza rukina n’Ibirwa bya Réunion.
Ikipe y’Igihugu y’u Rwanda, yitegurira iri rushanwa mu Nzu y’Imikino (Gymnasium) ya NPC i Remera mu Mujyi wa Kigali.
Kuri uyu wa gatanu tariki ya 01 Ugushyingo 2024, irahaguruka i Kigali ku Kibuga cy’Indege i Kanombe yerekeza i Addis Ababa.
Mu kwitegura iri rushanwa, tariki ya 30 Ukwakira 2024, yakinnye umukino wo kwipima n’ikipe ya Polisi HC, urangira itsinzwe ibitego 38-37.
