Nyuma y’uko Shampiyona y’i 2024 irangiye mu kiciro cy’abagore, amakipe yatangiye kwiyubaka, anitegura Umwaka mushya w’i 2025.
Ikipe y’Ikigo cy’Igihugu cy’Ingufu, REG Basketball Club, iri gushyirwa mu majwi nk’iyamaze gutanga izindi ku Isoko.
Ku mugoroba wo kuri uyu wa 07 Ukwakira 2024, yavuzweho kuba iri mu biganiro bya nyuma n’abakinnyi ‘ Dieudonné Ndayisaba na Steven Hagumintwari ‘ bari inkingi za mwamba mu ikipe ya Patriots BBC.
Ikinyamakuru The Newtimes cyanditse ko hari amakuru yizewe ahamya ko ibiganiro biri kugana ku musozo hagati y’iyi kipe n’aba bakinnyi bombi.
Mu gihe baramuka basinyishije aba bakinnyi bombi, kwaba ari kumwe mu kwiyubaka gukomeye iyi kipe ikoze, mu gihe kuri Patriots BBC yaba isa n’iciwe umugongo, kuko bari bamwe mu bo yagenderagaho kuva mu 2016 bayigezemo bavuye muri IPRC-Kigali.
Mu myaka hafi 8 bakinira Ikipe ya Patriots BBC, begukanyemo ibikombe bine (4) bya Shampiyona y’u Rwanda, ndetse banayifasha gukina imikino ya nyuma ya Basketball Africa League (BAL), mu 2021.
Muri uyu Mwaka, bombi bafashije iyi kipe kugera ku mukino wa nyuma wa Shampiyona, gusa ntabwo bahiriwe kuko batsinzwe na APR BBC.
N’ubwo ari abakinnyi bakomeye, ariko Dieudonné Ndayisaba Ngizeye uzwi nka Gaston, afite umwihariko yisangije.
Dieudonné Ndayisaba n’umwe mu bakinnyi bagaragaje uguhozaho kuva yakwinjira muri Shampiyona, by’umwihariko ageze mu ikipe ya Patriots BBC, mu gihe Hagumintwari atakunze koroherwa n’imvune, irimo n’itaramubaniye mu 2022-23.
Abifashijwemo n’impano yo gutsinda amanota 3 byo ku rwego ruhanitse, Ndayisaba yabaye umukinnyi ugiha abandi muri Shampiyona y’i 2019.
N’umwe mu bakinnyi kandi ikipe ya REG BBC yiyambaje mu 2022 ngo ayifashe mu mikino ya Basketball Africa League (BAL), n’ubwo atahiriwe nk’uko byari byagenze muri Patriots BBC ubwo yegukanaga umwanya wa kane.
Muri REG BBC, iyi kipe ntabwo yashoboye kurenga umukino wa 1/4.
N’ubwo gutandukana n’abakinnyi bakomeye bidashimisha abakunzi b’ikipe bavuyemo, kuri aba bombi umuntu yavuga ko igihe cyari kigeze ngo bajye kureba aho ubundi bweze.
Ku myaka 8 muri Patriots BBC, mu gihe baramuka bayivuyemo baba ari bamwe mu bakinnyi bamaze mu makipe yabo igihe kinini muri Shampiyona y’u Rwanda mu myaka ya vuba.
Muri aba, twavugamo nka Mugabo Arstide na Kubwimana Kazingufu Ally, bakiniye ikipe ya APR BBC igihe kitari gito.
