Imfungwa zirenga 1,600 zarekuwe ku cyumweru ziva muri gereza ya Makala i Kinshasa kubera impamvu z’uburwayi nk’uko abategetsi babitangaje, ni wo mubare munini urekuwe icyarimwe mu gikorwa kimaze iminsi cyo kugabanya ubucucike muri za gereza.
Iki gikorwa cyarangiye mu ijoro ryo ku cyumweru nk’uko bivugwa n’ibinyamakuru muri DR Congo, cyarebaga imfungwa byemejwe ko zirwaye bikomeye.
Minisitiri w’ubutabera Constant Mutamba wari ukuriye iki gikorwa, yumvikanye anenga gereza gufunga abantu barwaye mu buryo bukomeye kandi batavurwa bikwiriye.
Amashusho yagaragaje bamwe mu barekuwe batabasha kugenda kubera ibisebe bikabije bafite ku maguru ndetse n’intege nke.
Gereza ya Makala ni yo ifungiyemo abantu benshi muri DR Congo, yubatswe igenewe gufunga abantu 1,500 ariko bivugwa ko irimo abarenga 15,000, nk’uko imiryango itegamiye kuri leta ibivuga.
Abafunguwe ku cyumweru bakurikiye abarenga 600 bafunguwe ku wa gatandatu.
Bamwe mu barekuwe bumvikanye bashima Perezida Félix Tshisekedi kuko abakuriye ubutabera bavuga ko ari we wategetse ko imfungwa zimwe zirekurwa mu kugabanya ubucucike mu magereza.
Gusa bamwe mu baharanira uburenganzira bwa muntu banenga uburyo abantu bamwe bafungwa muri za gereza muri DR Congo bakamara imyaka bataraburanishwa.
Minisitiri Constant Mutamba yumvikanye abwira abarekuwe ko mu gihe bakwitwara nabi bageze hanze bazahita bongera bagafungwa.
Kurekura imfungwa – ubu zibarirwa mu bihumbi birenga bibiri mu byumweru bicye bishize – bikurikiye kugerageza gutoroka gereza kwiciwemo imfungwa 129 ku mibare yatanzwe na Leta. (BBC)
