Polisi ya Tanzania irimo gukora iperereza ku bagabo batanu bafashwe amashusho muri videwo yahererekanyijwe cyane ku mbuga za internet bivugwa ko iberekana barimo gufata ku ngufu mu kivunge umugore ukiri muto, ibintu byateje gusakabaka muri icyo gihugu.
Abashinzwe umutekano nta cyo bari batangaza ku birego byuko abo bacyekwa byemezwa ko ari abasirikare.
Polisi yavuze ko amaperereza yayo arimo “kugenda neza”, ariko ntiyemeje amakuru yuko hari abatawe muri yombi.
Yahakanye ko uwo mugore ukiri muto yapfuye nyuma y’akaga yahuye na ko, ivuga ko ibyo ari “ibinyoma”.
Mu itangazo ku rubuga nkoranyambaga X, polisi yagize iti: “Uyu mugore ukiri muto aratekanye cyane.”
Mu bundi butumwa, polisi yaburiye abaturage kwirinda guhererekanya iyo videwo ku mbuga za internet mu “kwirinda kwica urubozo uwabikorewe hamwe n’umuryango we”.
Iyo videwo ivugwa ko igaragaza umugore afatwa ku ngufu n’abagabo mu kivunge yatangiye guhererekanywa ku mbuga za internet ku cyumweru. Yateje ihungabana kuko Tanzania ari sosiyete ikomeye cyane ku mahame ya kera.
Iki gihugu kirimo kugorwa no guhangana no kwiyongera cyane kw’ihohoterwa rishingiye ku gitsina, mu gihe rimwe muri ryo ritamenyekana, nkuko bivugwa n’ibitangazamakuru byo muri Tanzania.
Ntibisobanutse igihe iyo videwo yafatiwe ariko uwo uvugwa ko yafashwe ku ngufu amakuru avuga ko ari umuturage w’i Yombo Dovya, agace ko mu nkengero y’umujyi w’ubucuruzi wa Dar es Salaam.
Polisi yashishikarije abantu gukomeza gutuza, mu gihe amaperereza akomeje, yongeraho iti: “Amakuru arambuye ku byabaye azatangazwa igihe tuzaba twarangije ibiteganywa n’amategeko.”
Imiryango iharanira uburenganzira bwa muntu n’abakoresha imbuga nkoranyambaga barimo gusaba abategetsi kugira icyo bakora mu buryo bwihuse ndetse nta kujenjeka.
Ikigo giharanira uburenganzira bwa muntu cyo muri Tanzania (Legal and Human Rights Centre) cyaburiye ko “kwirengagiza ibi bibazo kuzageza gusa ku gutuma bibaho kurushaho muri sosiyete yacu”.
Abanyamategeko bo mu ishyirahamwe Tanganyika Law Society bamaganye icyo bavuze ko ari “ihonyorwa rikomeye ry’amategeko y’igihugu n’amahame mbonezamubano”.
Minisitiri w’ubutegetsi bw’igihugu Hamad Masauni yasubiwemo avuga ko abacyekwa “bamaze” gutabwa muri yombi, ariko nta yandi makuru yatanze. (BBC)