Umuryango wa Afurika y’Iburasirazuba, EAC, wasabye ibihugu binyamuryango kurinda abaturage babyo kuko bashobora kwibasirwa n’ikwirakwira ry’indwara y’Ubushita bw’Inkende, izwi nka Mpox (Monkeypox).
Ni itangazo EAC yasohoye kuri uyu wa Mbere tariki 29 Nyakanga 2024, nyuma y’aho Ishami ry’Umuryango w’Abibumbye rishinzwe Ubuzima, OMS, ritangaje ko mu Burundi no muri Repubulika Iharanira Demukarasi ya Congo, RDC, hagaragaye iyi ndwara.
Kubeza ubu, u Burundi bumaze kwemeza ko bwabonye abarwayi batatu ba Mpox, aho bagaragaye mu Mujyi wa Bujumbura n’ahitwa Isare.
Ni mu gihe kuva mu 2022, RDC, imaze kubona abarenga 21,000 barwaye iyi ndwara y’Ubushita bw’Inkende, naho abarenga 1000 bo imaze kubahitana.
Muri icyo gihugu, umwaka ushize wa 2023, warangiye habonetse abarwayi 14,626 mu gihe abagera kuri 654 bahitanywe n’iyi ndwara y’Ubushita bw’Inkende.
Iyi mibare yatangajwe na OMS kandi igaragaza ko kuva muri Mutara kugeza muri Gicurasi 2024, muri RDC hari hamaze kugaragara abarenga 7,851 barwaye iyi ndwara mu gihe abo yahitanye bari 384.
Abenshi mu bandura iyi ndwara ni abana bari munsi y’imyaka itanu, aho bagera kuri 39%, mu gihe abagera kuri 1/3 ni ukuvuga 62% by’abo ihitana ari abana.
U Burundi buhana imbibi na RDC, u Rwanda na Tanzania mu gihe RDC yo ihana imbibe n’ibihugu bitanu byo muri EAC birimo Tanzania, u Rwanda, u Burundi, Uganda na Sudan y’Epfo.
Umuyobozi Wungirije w’Ubunyamabanga bwa EAC ushinzwe ibikorwaremezo na politiki, Andrea Aguer Ariik Malueth, yagaragaje ko ari ingenzi ko ibihugu binyamuryango bishyiraho ingamba zo gukumira ikwirakwira rya Mpox.
Muri iri tangazo yagize ati “Ibihugu binyamuryango bya EAC bigomba gutanga amakuru y’ingenzi kuri iki cyorezo bikanafata ingamba z’ubwirinzi.”
- Ibyo wamenya kuri Mpox
Iyi ndwara yandura cyane binyuze mu gukora ku muntu uyirwaye cyangwa amatembabuzi y’urwaye. Ishobora kwandura kandi mu buryo bw’imibonano mpuzabitsina, gusomana, cyangwa gusuhuzanya n’ufite ubwo burwayi.
Ibimenyetso byayo ni ukugira ibiheri ku mubiri biryaryata bikunze gufata imyanya ndangagitsina, mu maso, mu biganza no mu maguru. Ibindi bimenyetso ni kugira umuriro, kubabara umutwe, kuribwa mu ngingo no kugira amasazi.
Ikigo cy’Igihugu gishinzwe Ubuzima (RBC), giherutse gutangaza ko iyi ndwara yamaze kugera mu Rwanda nyuma yo kugaragara ku bantu babiri.
Umuyobozi w’Ishami rishinzwe kurwanya Indwara z’Ibyorezo muri RBC, Dr. Edson Rwagasore, yabwiye RBA ko ababonetse ari umugore w’imyaka 33 n’umugabo w’imyaka 34.
Rwagasore yasabye Abaturarwanda gufata ingamba zikomeye zirimo kwirinda kugirana imibonano mpuzabitsina n’ufite ibyo bimenyetso, kugira umuco wo gukaraba intoki hakoreshejwe amazi n’isabune.
RBC itangaza ko hashyizweho itsinda ry’abaganga riri gusuzuma mu bice bitandukanye bakabaza ibibazo bijyanye n’ubu burwayi. (EAC, RBA & THEUPDATE)