Ishyirahamwe ry’Umupira w’amaguru mu Rwanda, Ferwafa, ryatangaje ko tariki ya 10 Kanama 2024, aribwo hazakinwa umukino w’Igikombe kiruta ibindi, “Super Cup”.
Uyu mukino uzabera kuri Sitade yitiriwe Pele i Nyamirambo mu Mujyi wa Kigali, uzahuza Ikipe y’Ingabo z’Igihugu, APR FC yegukanye Igikombe cya Shampiyona n’iya Polisi y’Igihugu, Police FC, yegukanye icy’Amahoro.
APR FC yatwaye Shampiyona y’i 2023-24 idatsinzwe umukino n’umwe, mu gihe Police FC yatsinze Bugesera FC ku mukino wa nyuma w’Igikombe cy’Amahoro, ibitego 2-1.
Izi kipe zombi zaherukaga guhurira ahantu nk’aha mu 2016, icyo gihe APR FC ikaba ariyo yahikuye kigabo, Police FC itaha amara masa.
Uretse ibi kandi, APR FC imaze kwegukana iki gikombe inshuro eshatu (3), 2016, 2018 na 2022, mu gihe Police FC itazi iki gikombe.
Uyu mukino uzahuza aya makipe, uzakinwa mbere gato ho Iminsi ine, ngo atangire urugamba rwo guhagarira Igihugu mu marushanwa ny’Afurika, aho APR FC izahagararira u Rwanda mu mikino ya CAF Champions League icakirana na AZAM FC yo muri Tanzaniya, mu gihe Police FC izisobanura na Constantine yo muri Algeria mu mikino ya CAF Confederations Cup.
Mu Mwaka ushize, APR FC yatsindiwe ku mukino wa nyuma w’iri rushanwa inyagiwe na mukeba wayo w’ibihe byose, Rayon Sports FC, ibitego 3-0.