Abahagarariye imitwe ya Politike yemewe mu Rwanda, bemeza ko amahitamo y’abaturage yo kwitorera abayobozi, bishimangira inzira ya Demokarasi imaze kugerwaho mu myaka 30 ishize Jenoside yakorewe Abatutsi ihagaritswe.
Kimwe nk’abandi baturage, abahagarariye imitwe ya Politike yemewe mu Rwanda, bitabiriye ibikorwa by’amatora y’Umukuru w’Igihugu n’Abadepite byabereye mu bice bitandukanye.
Perezida w’Ishyaka PS Imberakuri, Mukabunani Christine n’ubwo yibuze kuri Lisite y’itora kuri Site ya Gatenga mu Karere ka Kicukiro, ntibyamubujije amahirwe yo kwihitiramo abo yumva bateza igihugu imbere.
Ni ibikorwa Mukabunani ashimangira ko ari inzira nziza ya Demokarasi imaze kugerwaho mu Rwanda.
Naho Perezida wa PSD, Ishyaka riharanira Demokarasi n’Imibereho myiza y’ Abaturage, Dr Vincent Biruta yifatanyije n’abaturage bo mu Karere ka Gasabo atorana nabo kuri Site ya Kigali Chritian School.
Dr Biruta yemeza ko uguhatana kwa buri mu kandida mu byiciro bitandukanye, bigaragaza igipimo ubudasa u Rwanda rumaze kugeraho.
Ibi abivuga yifitiye icyizere cy’insinzi muri aya matora haba ku mwanya w’Umukuru w’Igihugu n’Abadepite b’iri shyaka.
Ni nako Perezida w’Ishyaka Ntanagarugero muri Demokarasi, PDI Sheikh Musa Fazil Harerimana nawe yifatanyaga n’abaturage mu Karere ka Gsabo kuri Site ya APAPER.
Sheikh Musa Fazil ashimangira ko aya matora agaragaza ubudasa muri demokarasi nk’uko Itegeko Nshinga ribiteganya.
Perezida w’Ishyaka Riharanira Ukwishyira Ukizana kwa buri Muntu PL, Donatille Mukabalisa yatoreye kuri Site yari iherereye ku kigo cya Tekinike cya Gacuriro mu Murenge wa Kinyinya.
Kugeza ubu imitwe ya Politike 8 yahisemo kwifatanya maze ishyigikira umukandida, Paul Kagame ku mwanya w’Umukuru w’Igihugu.
Mu Ijoro ryakeye, Umuyobozi wa Komisiyo y’Igihugu y’Amatora, Oda Gasinzigwa, yatangaje ko amajwi y’agateganyo agaragaza ko Kagame Paul yatsinze amatora n’amajwi 99,15%, akurikirwa na Habineza Frank wagize amajwi 0,53%, mu gihe Mpayimana Philippe yagize amajwi 0,32%.
Ibyavuye mu matora ku buryo budasubirwaho, bizatangazwa tariki ya 27 Nyakanga 2024, bikurikirwe n’irahira rya Perezida, uzayobora u Rwanda muri Manda y’Imyaka 5, ibyitezwe ko azaba ari Kagame Paul, Umukandida w’Umuryango FPR-Inkotanyi.
Amafoto
