Polisi ya Kenya yatangaje ko yataye muri Yombi Umugabo wiyitaga ko ari Umwicanyi kabuhariwe, nyuma yo kwica abagore 42 akabata mu Ngaranti/Ikimoteri.
Ku wa Gatanu w’Icyumweru gishize, Imirambo y’abagore 9 yasanzwe iri muri iyi Ngaranti, atangira guhigwa bukware.
Ibi byabereye mu gace ka Mukuru gatuwemo n’abatishoboye hafi y’Umurwa Mukuru wa Kenya, Nairobi.
Akomoza kuri aya makuru, Umuyobozi w’agateganyo wa Polisi ya Kenya, Douglas Kanja, yatangaje ko uyu ushinjwa guhitana aba Bagore, ari Collins Jumaisi Khalushaafise w’imyaka 33.
Douglas yatangaje ko Collins yatawe muri Yombi saa Cyenda z’Igicamunsi cyo kuri uyu wa Mbere tariki ya 15 Nyakanga 2024, afatiwe hafi y’Akabari.
Ibiro ntaramakuru by’Abafaransa, AFP dukesha iyi nkuru, byatangaje ko Collins yiyemerera ubu bwicanyi.
AFP ivuga Collins yatangaje ko kugira ngo yica aba Bagore bose, yagiye abashukashuka, bakamusanga iwe, yamara kubica akabajugunya mu Ngaranti.
Collins ngo yemeye ko Umugore wa mbere yamwishe amunize, nyuma amujugunya muri iyi Ngaranti isanzwe ijugunywamo Imyanda.
Nyuma yo guta muri Yombo Collins, Umuyobozi w’agateganyo wa Polisi ya Kenya, yatangaje ko iperereza kuri aba Bagore bishwe, rihita ritangira.
