Nyuma y’Iminsi ibiri rikinirwa kuri Pisine y’Ishuri rya Green Hills Academy, Irushanwa Mpuzamahanga ry’Umukino wo Koga “Mako Sharks Summer Invitational Swimming Championship”, ryegukanywe n’Ikipe ya Mako Sharks yo mu Rwanda.
Iri Rushanwa ryateguwe n’Ikipe ya Mako Sharks ku bufatanye na Davis & Shirtliff, Mako Sharks yaritwaye nyuma yo gukusanya Amanota 3597, nyuma yo guhiga izindi muri Events 1113.
Kuri iyi nshuro ya kabiri rikinwa ku rwego mpuzamahanga no ku nshuro ya kane muri rusange, ryitabiriwe n’amakipe Ane (4) yo muri Uganda n’Atatu (3) yo mu Rwanda.
Abakinnyi bari hagati y’Imyaka 8 no munsi yayo, 9-10, 11-12, 13-14 na 15 kuzamura, bazarushanyijwe mu Nyogo zitandukanye, by’umwihariko harimo Relay ikundwa n’abatari bacye.
Inyogo zozwe zirimo; Freestyle 50m, 100m, 200m, 400m, Backstroke 50m, 100m, Breaststroke 50m, 100m, 200m, Butterfly 50m, 100m, Individual Medley 100m, 200m, Relays 4X50m Mixed Medley Relay Open, iyi ikazakinwa n’ikipe igizwe n’abakinnyi 2 b’abakobwa na 2 b’abahungu, 4X50m Freestyle Relay Open, iyi izakinwa n’ikipe y’abakinnyi 4 b’abakobwa n’abakinnyi 4 b’abahungu.
Amakipe yo muri Uganda yari arimo; AQUATIC ACADEMY KAMPALA na WHALES SWIM ACADEMY ENTEBBE zombi yari inshuro ya mbere zikina iri Rushanawa.
Hari kandi HERTZ SWIM CLUB na SILEVERFIN ACADEMY zakinaga iri Rushanwa ku nshuro ya kabiri.
Ku ruhande rw’Amakipe yo mu Rwanda, ryitabiriye na; Cercle Sportif de Karongi yakinaga iri Rushanwa ku nshuro yayo ya gatatu, Kigali Sporting Club yarikinaga ku nshuro ya mbere na Mako Sharks ku nshuro ya kane.
Irushanwa rya Mako Sharks Summer Invitational Swimming Championship ry’uyu Mwaka, ryakinwe n’abakinnyi 170 bavuye kuri 98 baryitabiriye Umwaka ushize.
- Uko amakipe yakurikiranye
1. Mako Sharks Swimming Club (Rwanda): Yegukanye Igikombe n’amanota 3597
2. Aquatic Academy Kampala (Uganda): Yabaye iya Kabiri, ikusanya amanota 3590.5
3. SILVERFIN ACADEMY (Uganda): Yabaye iya Gatatu n’amanota 1658
4. Cercle Sportif de Karongi (Rwanda): Yabaye iya Kane n’amanota 1127
5. HERTZ SWIMMING CLUB (Uganda): Yabaye iya Gatanu n’amanota 929
6. Kigali Sporting Club (Rwanda): Yabaye iya Gatandatu n’amanota 492
7. Whales Swimming Academy Entebbe (Uganda): Yatwaye iya Karindwi n’amanota 210.
Akomoza kuri iri Rushanwa, Umuyobozi w’Ikipe ya Mako Sharks yariteguye, Bwana Bazatsinda James, mu kiganiro yahaye Itangazamakuru yagize ati:“Kuri iyi nshuro ya kabiri rikinwa ku rwego mpuzamahanga, ubwitabire buratugaragariza ko igitekerezo twagize turitegura, kiri kugenda gishinga Imizi”.
Yakomeje agira ati:“Kuba hari amakipe ava hanze y’Igihugu akaza kuryitabira, byaradushimishije. Twari twatumiye amakipe yandi arimo ayo muri Kenya, Ghana na DR-Congo, gusa aya ntabwo byakunze ko aza, ariko Umwaka utaha turayiteze”.
“Urwego rwo guhangana rumaze kuzamuka by’umwihariko imbaraga zikoreshwa n’abakinnyi mu kugabanya ibihe basanzwe bafite, bashaka gukora ibyiza kurushaho”,
Yasoje agira ati:“Turifuza ko iri Rushanwa rifungura Amaso n’andi makipe ndetse rigahumura n’abashoramari, bakabona ko binyuze mu mukino wo Koga, barushaho kumenyekanisha ibikorwa byabo, n’andi makipe akunga mu ryacu nayo agategura amarushanwa, ibi bikaba byarushaho gufasha abakinnyi kubona amarushanwa ndetse no gushyigikira Ishyirahamwe ry’Umukino wo Koga mu Rwanda, mu marushanwa risanzwe ritegura”.
“Turifuza ko Umwaka utaha iri Rushanwa rizitabirwa n’amakipe asaga 15 avuye mu bihugu bitandukanye byo muri Afurika, ndetse intego n’uko ryazajya ku rwego rutanga amanota yemerwa n’Impuzamashyirahamwe y’umukino wo Koga ku Isi (World Aquatics)”.
Mako Sharks Summer Invitational Swimming Championship, n’Irushanwa ritegurwa rigamije kwimakaza Ubuvandimwe muri Siporo by’umwihariko mu bakinnyi bo mu bihugu byo muri aka Karere no kurushaho gufasha abakinnyi b’Umukino wo Koga kubona Amarushanwa abakura ku rwego rumwe akabageza ku rundi.
Amafoto
