Mu gihe guhera tariki ya 24 Gicurasi kugeza ku ya 01 Kamena 2024 i Kigali mu Rwanda hazaba hakinirwa imikino ya nyuma y’Irushanwa rya Basketball Africa League (BAL), amakipe yamaze kugera i Kigali.
Kuri uyu wa mbere, mu masaha yo ku Gicamunsi, Amakipe ya Rivers Hoopers yo muri Nigeriya na Cape Town Tigers yo muri Afurika y’Epfo nizo zabimubiriye izindi.
Iyi mikino izakinirwa mu Nyubako y’Imikino izwi nka BK-Arena iri i Remera mu Mujyi wa Kigali, izasiga itanze Ikipe yegukana iri Rushanwa riri gukinwa ku nshuro ya Kane (4).
Uretse aya makipe abiri yabimburiye ayandi, Ikipe ya Petro de Luanda, US Monastir (Tunisia), Al Ahly SC (Egypt), Al Ahly Ly (Libya), FUS Rabat (Morocco) na AS Douanes (Senegal), zaraye zigeze mu Rwanda mu Ijoro ryo kuri uyu wa Mbere tariki ya 20 Gicurasi 2024.
Biteganyijwe ko aya makipe uko ari Umunani (8), yose azacumbikirwa muri Hotel Ebyiri (2), arizo; Four Points by Sheraton na Radisson Blu Hotel.
Guhera ku wa 24 Gicurasi, Amakipe azatangira kwesurana. Iyi mikino izakinwa mu buryo Ikipe itsinze izahita ikomeza mu mikino ya 1/2, mu gihe itsinzwe ari ugutaha.
Kugeza ubu, nta kipe iregukana iri Rushanwa inshuro irenze imwe, muri Eshatu (3) rimaze gukinwa.
Ku ikubitiro, Ikipe ya Al Ahly yo muri Libya, izatangira iri Rushanwa yesurana na Cape Town Tigers yo muri Afurika y’Epfo, uyu mukino ukazakurikirwa n’uzahuza Al Ahly yo muri Misiri na FUS Rabat yo muri Maroke.
Umukino wa Al Ahly na FUS Rabat uzaba uhanzwe amaso n’abatari bacye, bitewe n’uko Al Ahly ariyo ibitse iki gikombe, mu gihe FUS Rabat yegukanye agace ka Kalahari.
Iyi mikino igiye gukinwa ikurikira isozwa Agace ka Sahara kakiniwe i Dakar muri Senegal, aka kakaba karatanze amakipe 3 yari asigaye ataramenyakana.
Ni ku nshuro ya mbere iyi mikino ya nyuma igiye gukinwa hatarimo Ikipe yo mu Rwanda, nyuma y’uko Ikipe y’Ingabo z’u Rwanda, APR BBC, inaniwe kwikura mu Makipe yitabiriye Agace ka Sahara kakiniwe muri Senegal.
Uko amakipe yitwaye mu mikino yo gukatisha itike yerekeza i Kigali
1 – Al Ahly SC (5-1)
2 – FUS Rabat (3-1)
3 – Rivers Hoopers (4-2)
4 – AS Douanes (3-3)
5 – Petro de Luanda (2-2)
6 – US Monastir (3-3)
7 – Al Ahly Ly (3-3)
8 – Cape Town Tigers (1-3).
Ku nshuro ya mbere iri Rushanwa rikinwa mu 2021, ryegukanywe n’Ikipe ya Zamalek, mu 2022 ritwarwa na US Monastir mu gihe mu Mwaka ushize ryegukanywe n’Ikipe ya Al Ahly yo mu Misiri.
Ikipe yo mu Rwanda ifite amanota meza muri iri Rushanwa, n’Ikipe ya Patriots BBC yageze mu mikino ya 1/2, ubwo iri Rushanwa ryakinwaga ku nshuro ya mbere.