Mu rwego rw’inkuru zihariye zisobanura ibireba amatora muri Leta zunze ubumwe z’Amerika, uyu munsi turarebera hamwe ukuntu abakandida biyamamariza umwanya w’umukuru w’igihugu, Perezida Joe Biden w’Umudemokarate na Donald Trump w’Umurepubulikani, bakeneye amajwi y’Abirabura.
Mu mateka, Abirabura benshi baha amajwi yabo ishyaka ry’Abademokarate. Nko mu myaka ya vuba, 85 ku ijana muri bo bahisemo abakandida b’Abademokarate mu matora yose yo mu nzego z’ibanze, mu nzego za leta zigize igihugu, no ku rwego rw’igihugu. Ku rundi ruhande, Abirabura byibura 10 ku ijana bahora batora ishyaka ry’Abarepubulikani.
Mu matora y’uyu mwaka, Abarepubulikani baraharanira kwambura Abademokarate ubu bwiganze bw’amajwi. Urugero ni nko muri leta ya Wisconsin, iri mu burengerazuba bw’igihugu. Muri rusange, abaturage bayo batoye Donald Trump mu 2016, ariko mu 2020 batora Joe Biden. Ntawe uzi uwo bazahitamo mu kwezi kwa 11 gutaha. Ni yo mpamvu ari imwe muri leta nke zishobora kuzakemura impaka.
Kugirango Abarepubulikani bashyire amahirwe ku ruhande rwabo muri Wisconsin, basanga Abirabura bazabigiramo uruhare runini. Orlando Owens ni perezida w’ishyaka ry’Abarepubulikani ku rwego rw’intara ya Milwaukee w’Umwirabura wa mbere na mbere mu mateka.
“Si ngombwa ko Milwaukee iba iy’Abarepubulikani. Dukeneye gusa akarusho mu majwi. Dushoboye kukabona hano mu mujyi, akarusho gato mu ntara, twatsinda muri leta yose. Dutsinze muri leta yose twatsinda no mu gihugu cyose.”
Ishyaka ry’Abarepubulikani rizakoresha inama kaminuza yo kwimika kandida-perezida Trump ku mugaragaro mu kwezi kwa karindwi gutaha muri Milwaukee.
Milwaukee ifite abaturage hafi miliyoni imwe. Ni yo ntara ituwe cyane kurusha izindi muri Wisconsin. Mu 2020, Biden yatsinze muri leta ya Wisconsin arusha Trump amajwi 21,000 muri rusange. Ariko yamurushije amajwi arenga 145,000 muri Milwaukee. Abashakashatsi bo muri kaminuza yigenga y’Abayezuwiti yitwa Marquette y’i Milwaukee, bavuga muri aya majwi ya Biden, 53 ku ijana yaturutse mu Birabura.
Abakandida ku mwanya w’umukuru w’igihugu, Biden na Trump, bombi barangije kubona amajwi abibemerera mu majonjora y’imbere mu mashyaka yabo, n’ubwo atararangira bwose. Bombi bashishikajwe cyane n’amajwi y’Abirabura muri rusange.
Muri mitingi imwe aherutse gukoresha, Trump yabwiye abayoboke be ko Abirabura bamwibonamo. Bityo yumva ko ari we benshi bazaha amajwi.
“Abantu benshi bavuga ko izi manza zatumye Abirabura bankunda. Kubera iki? Barababaye cyane. Bamye bahabwa akato. Basanga rero nanjye nibasiwe. Ntako bisa.”
Kuri Prof Cathy Cohen, Biden ntiyakwiha gutakaza amajwi y’Abirabura muri Wisconsin. Cathy Cohen yigisha ibya politiki muri kaminuza ya Chicago, muri leta ya Illinois, nayo iri mu burengerazuba bwo hagati bw’igihugu.
“Abantu benshi bakurikirana iby’amatora bavuga ko Biden atsinzwe muri Milwaukee yatsindwa no muri leta ya Wisconsin yose. Ndatekereza ko abamufasha kwiyamamaza nabo babizi neza. Niteze ko bazashyira imbaraga nyinshi mu bikorwa byabo kandi bazahasura cyane.”
Biden nawe ubwe aherutse kujya kwiyamamaza muri Wisconsin. Yahatangarije ko agiye gushyiraho ikigega cyo gukosora icyo yise “akarengane ka karande.”
“Kuva mu bisekuruza bitabarika, Abirabura, Abasangwabutaka, abakomoka muri Amerika y’Epfo n’Aziya ntibigeze bahabwa umwanya ukwiye muri demokarasi yacu, mu bukungu bwacu.”
Yavuze ko iki kigega kizibanda ku bikorwaremezo, no kubona imilimo n’amashuli. Nyamara rero, nk’uko icyegeranyo giheruka gukorwa na kimwe mu biyamakuru bikomeye mu gihugu Washington Post, gifatanyije n’ikigo Ipsos cyazobereye mu gucukumbura ibipimo, cyemeza ko Biden afite ingorane zo kwiyegereza Abirabura, cyane cyane mu bakiri bato. Umwirabura umwe kuri batanu batoye Biden mu 2020 bavuga ko batizeye ko bazongera kumuha amajwi yabo uyu mwaka.
Naho kuri Trump, iki cyegeranyo cyerekana ko Abirabura 83 ku ijana mu bafite imyaka yo gutora batamubona neza. Naho 80 ku ijana bemeza ko adakunda Abirabura.
Hagati aho, icyegeranyo Post-Ipsos gisobanura ko muri rusange Abirabura 62 ku ijana ari bo bavuga ko bazatora uyu mwaka muri rusange mu gihugu cyose. Bagabanutseho 12 ku ijana ugereranyije n’abatoye mu 2020. (VoA)
Amafoto
![](https://gdb.voanews.com/4b72d9a9-05a4-4ec4-a976-2ac12ca5c73a_w650_r1_s.jpg)
![](https://gdb.voanews.com/d826e231-c6b7-4ef5-acb3-a6555c67e1a3_w650_r1_s.jpg)