Ikipe ya Rayon Sports yatangaje ko yamaze kugirana amasezerano y’ibanze n’abakinnyi babiri bakinira ikipe y’Igihugu ya Repubulika ya Demokarsi ya Congo.
Aba ni myugariro Eddy Ngoyi Emomo na rutahizamu Jonathan Ifunga Ifasso.
Biteganyijwe ko bombi bagera mu Rwanda mu mpera z’iki Cyumweru, bazanywe no gushyira umukino ku masezerano azabageza muri Kamena y’Umwaka w’i 2025.
Kuri ubu, Eddy Ngoyi Emomo akinira ikipe ya Wolkite City FC yo mu gihugu cya Ethiopia.
Yatangiye guconga ruhago ku rwego mpuzamahanga guhera mu 2012, nyuma y’Umwaka umwe gusa, mu 2013 ashyirwa mu bakinnyi b’Ikipe y’Igihugu ya Repubulika ya Demokarasi ya Congo bakinnye imikino ny’Afurika y’Urubyiruko.
Uretse gukina muri Ethiopia, Ifunga Ifasso yakinnye mu ikipe ya Difaâ Hassani El Jadidi, ikina Shampiyona y’ikiciro cya mbere mu gihugu cya Maroke.
Yahamagawe ku nshuro ya mbere mu ikipe y’Igihugu mu Kwakira tariki 09 mu Mwaka w’i 2020, mu mukino Repubulika ya Demokarasi ya Congo yatsinzemo Burkina Faso 3-0.
Atangira urugendo rwo guconga ruhago, yahereye mu ikipe ya Dauphin Noir na Nyuki zombi muri Repubulika ya Demokarasi ya Congo, mbere yo kwerekeza muri Difaâ Hassani El Jadidi mu Mwaka w’i 2019.
Mu gihe bombi baramuka basinyiye Rayon sports, bitezweho kuzayifasha mu mikino ya Shampiyona 2023/24 iteganyijwe gutangira mu Kwezi gutaha (Kanama), ndetse no kuzabifashisha mu mikino ya CAF Confederation Cup.
Kuri ubu, Rayon Sports iri ku isoko mu buryo butandukanye n’uko yari ihanzwe, mu gihe ihanganye na mukeba APR FC nayo yagarutse ku isoko ryo kongera gukoresha abakinnyi mpuzamahanga.
Mu gihe itegereje aba bakinnyi, Rayon Sports yamaze gusinyisha Umunyezamu w’Ikipe y’Igihugu ya Uganda, Simon Tamale imukuye mu ikipe ya Maroons FC ikina Shampiyona y’ikiciro cya mbere muri Uganda.
Imbere mu gihugu, imaze gusinyisha Serumogo Ally yakuye mu ikipe ya Kiyovu Sports ndetse na Mitima Isaac yongereye amasezerano.
