Abakinnyi bakabakaba 1500 bamaze kwiyandikisha kuzitabira Irushanwa ryo gusiganwa ku Maguru ribera mu Karere ka Bugesera rizwi nka 20 km de Bugesera, riteganyijwe kuri iki Cyumweru tariki ya 02 Nyakanga 2023.
Iri rushanwa rikinwa mu byiciro bitandukanye, ritegurwa na Gasore Serge Foundation ku bufatanye n’Akarere ka Bugesera.
Mu nyito igira iti “Run to Restore”, rikinwa mu rwego rwo kugaragaza uburyo Akarere ka Bugesera kiyubatse nyuma yo gushegeshwa na Jenoside yakorewe Abatutsi mu 1994.
Kuri iyi nshuro u Rwanda rwibuka ku nshuro ya 29 Jenoside yakorewe Abatutsi, iri rushanwa ryari rimaze Imyaka ibiri (2) ridakinwa, abazaryitabira bazakomeza gukangurirwa ihame ry’Ubumwe n’Ubwiyunge ndetse n’Ubudaheranwa bw’Abanyarwanda.
Nk’uko yakinwe mu 2021 ubwo yaherukaga, abazitabira 20 km de Bugesera bazasiganwa ku maguru ku ntera ireshya na Kilometero 20 ariryo Siganwa rikuru, Kimometero 8 ku bakiri bato n’ikiciro cya Kilometero 5 ku bazasiganwa batabigize umwuga.
Uretse abazasiganwa ku maguru, biteganyijwe ko hari n’abazarushanwa bakoresheje Igare, aba bakazahatana ku ntera ka Kilometero 40 (40 km).
Uretse ibi byiciro, hari n’ikiciro kihariye kizitabirwa n’abantu bafite Ubumuga mu rwego rwo kubereka ko nabo ari abantu nk’abantu.
Agaruka kuri iri Rushanwa mu kiganiro n’Itangazamakuru, Meya w’Akarere ka Bugesera Bwana Mutabazi Richard yagize ati:“Kuri iyi nshuro, rizakina dukangurira abaturage kugira umuco w’Isuku no kurwanya Ibiyobyabwenge.”
Yunzemo agira ati:
Iri rushanwa rigiye gukinwa ku nshuro yaryo ya Gatandatu (6). Buri uko Umwaka utashye, ridusigira umukoro wo gutegura irizakurikiraho. Bityo uyu Mwaka tuzitsa cyane ku ngamba zo kugira Isuku no kurwanya Ibiyobyabwenge.
Biteganyijwe ko iri Rushanwa rizatangirira kuri La Palisse Hotel mu Mujyi wa Nyamata mu Bugesera guhera saa Mbiri za Mugitondo, ari naho rizasorezwa.
Amafoto
