Turahirwa Moses washinze inzu y’Imideli izwi nka Moshions, yasutse amarira atakambira Urukiko Rwisumbuye rwa Nyarugenge ko rwamurekura akajya aburana ari hanze.
Tariki ya 10 Gicurasi, nibwo yatangiye kuburana ku ifungwa n’ifungurwa by’agateganyo maze tariki ya 15 Gicurasi Urukiko rwanzuro ko agomba gufungwa iminsi 30 y’agateganyo mu gihe iperereza rigikomeje.
Urukiko rugendeye ku mpungenge z’ubushinjacyaha ko ashobora kubangamira iperereza ndetse icyaha akurikiranyweho (cyo gukoresha ibiyobyabwenge) akaba ari icyaha gikomeye kandi umuntu ukurikiranyweho icyaha gikomeye gifungirwa kuva ku mezi 6 kugera ku myaka 5 aburana afunze.
Moses yahise ajuririra iki cyemezo aho yatangiye kuburana mu bujurire uyu munsi mu Rukiko Rwisumbuye rwa Nyarugenge.
Turahirwa yasabye ko rwakuraho icyemezo yafatiwe n’urw’ibanze kubera impamvu enye.
Impamvu ya mbere ni uko Urukiko rwamukatiye gufungwa iminsi 30 y’agateganyo rwasesenguye ingingo uko zitari rugashingira ku ngingo zitaregewe ndetse atigeze aburana.
Aha Turahirwa yavugaga ko atigeze aregerwa kwamamaza urumogi nk’uko Urukiko rwabishingiyeho rwemeza ko akwiye gufungwa iminsi 30 y’agateganyo hagakorwa iperereza adakomeje kwamamaza urumogi nk’uko akunze kubikora ku mbuga nkoranyambaga.
Ikindi yavuze ni uko mu gufatirwa icyemezo cyo gukurikiranwa afunze hashingiwe ku rumogi rwasanzwe iwe mu rugo nyamara mu by’ukuri akaba atazi neza uko rwahageze, agahamya ko rushobora kuba rwarasigaye mu mashati yakusanyije mu Butaliyani mu rwego rwo kongera kuyavugurura.
