Handball: Makelele HBC na Ngome HBC mu makipe azitabira Irushanwa ryo Kwibuka Jenoside yakorewe Abatutsi

Mu mpera z’iki cyumweru tariki ya 03 n’iya 04 Kamena 2023, i Kigali mu Rwanda harakinwa imikino yo Kwibuka abari abakunzi, abakinnyi ndetse n’abayobozi mu makipe atandukanye ya Handball, bazize Jenoside yakorewe Abatutsi mu 1994.

Iri rushanwa ry’uyu mwaka rizakinwa n’amakipe yo mu Rwanda, hakiyongeraho amakipe abiri azaturuka hanze y’u Rwanda ari yo Makelele University (Uganda) mu bagabo ndetse na Ngome HC mu bagore izaturuka muri Tanzania.

Kuri uyu wa Gatandatu, harakinwa imikino y’amajonjora mu matsinda ndetse na ¼ mu bagabo n’abagore, mu gihe ku Cyumweru hazakinwa imikino ya nyuma mu byiciro byombi.

Iyi mikino izabera ku Bibuga bya Kaminuza y’u Rwanda ishami rya Remera (UR-Remera), ku Kimisagara ndetse n’ikibuga kigezweho kiri i Nyamirambo ari nacyo kizakira Imikino ya nyuma.

Mu mwaka ushize, mu kiciro cy’abagore igikombe cyegukanywe na
KIZIGURO SS itsinze GICUMBI WHT ibitego 33 kuri 23.

Mu gihe mu bagabo, igikombe cyatwawe n’ikipe ya Gicumbi HC itsinze Police HC ibitego 44 kuri 37.

Mu butumwa yageneye abari bitabiriye iyi mikino yo Kwibuka ku nshuro ya 28 Jenoside yakorewe Abatutsi mu 1994 , Umuyobozi w’Ishyirahamwe rya Handball mu Rwanda, Bwana Alfred Twahirwa yashimiye amakipe yaturutse yanze y’u Rwanda yaje kwifatanya n’Ishyirahamwe rya Handball mu mikino ya GMT, yungamo ko irushanwa ryazamuye urwego rw’imikinire kuko hagaragayemo ishyaka mu kibuga.

Yagize ati:“Ni irushanwa ryari ku rwego rwo hejuru kandi ryadufashije kumenya urwego rw’abakinnyi, urwego rw’abatoza ndetse n’urwego rw’abasifuzi bijyanye na gahunda zindi dufite z’amahugurwa, ariko muri rusange irushanwe ryagenze neza. Amakipe yaturutse hanze twaganiriye uko irushanwa twarishyira ku rundi rwego umwaka utaha ndetse n’andi makipe twazatumira”.

Yasoje avuga ku kibuga cya Kimisagara ko hari abana batangiye batoragura imipira, ariko nyuma y’imyaka 10 ubu abo bana bari mu makipe atandukanye, bityo kuba abenshi baza kureba iyi mikino ari benshi nuko baza kureba abana babo barimo gukina, ikindi ni umukino ubonekamo ibitego byinshi kandi n’amacenga aryoheye ijisho niyo mpamvu umukino wa handball ari umukino uryoheye abawukurikirana, kuko buri kanya ibitego biba byinjira.

Uko amakipe yashyizwe mu matsinda