GISAKA SPORTS CENTER LTD ibinyujije mu ishuri ryayo ryigisha abakiri bato umukino wa Volleyball, Gisaka Sports Center Academy ikorera mu Karere ka Kirehe mu Ntara y’i Burasirazuba, yateguye Urugendoshuri mu Karere ka Gisagara mu rwego rwo gutsura umubano no gukundisha abakiri bato umukino wa Volleyball, dore ko bazanaboneraho kuhakinira umukino wa gicuti na bagenzi babo bo muri aka Karere ko mu Ntara y’Amajyepfo y’Igihugu.
Ishingiye ko Akarere ka Kirehe gafite umwihariko mu guteza imbere imikino by’umwihariko Volleyball, aho kazwi nk’igicumbi cy’uyu mukino ku rwego rw’Igihugu, GISAKA SPORTS CENTRE LTD yateguye igikorwa cy’imurikabikorwa rya siporo (Sports Exhibition).
Kimwe mu bizaranga iri murikabikorwa, harimo n’uru rugendoshuri rugamije gutsura umubano n’urubyiruko rw’Akarere ka Gisagara hagamijwe gusabana, kwidagadura, ubukerarugendo, kurushanwa mu mukino wa Volleyball no gushimangira umubano hagati y’Uturere twombi binyuze muri uyu mukino.
GISAKA SPORTS CENTRE LTD ifite intego yo guteza imbere siporo n’imikino by umwihariko mu Karere ka Kirehe.
Muri uwo mujyo, izibanda mu kuzamura impano z’abakiri bato bakina umukino wa Volleyball mu mashuri no kubafasha kwitabira amarushanwa hagamijwe kubafasha gukabya inzozi zbo.
Ku bufatanye n’ababyeyi, iki gikorwa kandi cyateguwe hagamijwe guhuza urubyiruko rw’Uturere twombi ngo rugaragaze impano rufite mu mukino wa Volleyball mu kiciro cy’abakobwa n’abahungu biga mu mashuri abanza (Primary) n’icyiciro rusange (O’ Level).
Uretse kandi umukino uzahuza Akademi (Academy) ku mpande zombi, iri tsinda rizaba rivuye mu Karere ka Kirehe biteganyijwe ko rizanasura Ingoro Ndangamateka y’u Rwanda mu Rukari i Nyanza, mu rwego rwo gusobanurira no kwigisha abakiri bato Amateka y’Igihugu.
Aganira na THEUPDATE, Umuyobozi wa GISAKA SPORTS CENTRE LTD, Me NGIRUWONSANGA Donat, yatangaje ko umukino wa Volleyball ari umwe mu yo u Rwanda rufitemo impano ndetse ko ziramutse zitaweho bihereye mu bakiri bato, Igihugu cyabibonamo umusaruro ku rwego mpuzamahanga.
