Mu kiganiro yagiranye na televiziyo Fox News ya hano muri Leta zunze ubumwe z’Amerika, Christopher Wray, umuyobozi wa FBI (ikigo cy’igihugu cy’ubugenzacyaha) yaratangaje, ati: “Hashize agahe twarageze ku mwanzuro ko inkomoko y’icyorezo ishobora cyane kuba ari impanuka mu kigo cy’ubushakashatsi cya leta kiri i Wuhan.”
Christopher Wray yemeza kandi ko “guverinoma y’Ubushinwa ikora ibishoboka byose kugirango iburizemo anketi Amerika n’andi mahanga bakora ku buryo Covid-19 yavutse n’aho yaturutse.”
Ati: “Birababaje.”
Mbere y’umuyobozi wa FBI, Minisiteri y’ingufu ya Leta zunze ubumwe z’Amerika, ari nayo ishinzwe za laboratwari zikora ubushakashatsi kuri za virusi, yari yatangaje ko nayo “ikeka ko Covid-19 yavuye ku mpanuka yabaye muri laboratwari y’i Wuhan.” Ariko rero, Amerika ivuga ko inzego z’iperereza zayo zose zitaragera ku mwanzuro umwe. Zimwe na zimwe ziracyavuga ko zitarabona neza aho virusi ya Covid-19 yakomotse.
Leta y’Ubushinwa yamaganye ibyo minisiteri y’ingufu na FBI batangaje. Umuvugizi wa minisiteri yayo y’ububanyi n’amahanga, Mao Ning, avuga ko “Amerika irashaka kubigira ibya politiki.”
Ati: “Ariko ntizashobora kudutesha agaciro, ahubwo ni yo izakitesha. Igomba kwemera ibyo siyanse yerekana.” Mao Ning yemeza ko nta na kimwe Ubushinwa bwigeze buhisha.
Covid-19 yagaragaye bwa mbere na mbere mu Mujyi wa Wuhan, uri hagati no hagati mu Bushinwa, mu Kwezi kwa 12, 2019.
Bitangazwa ko yahitanye abantu bagera kuri Miliyoni zirindwi ku Isi.
