Triathlon: Ishimwe Hertier yegukanye umwanya wa 46 mu bakinnyi 956 bitabiriye Irushanwa rya ‘Ironman 70.3 Durban’

Ishimwe Hertier ukinira ikipe y’Igihugu y’umukino wa Triathlon n’ikipe ya Cercle Sportif de Karongi, yegukanye umwanya wa 46 mu bakinnyi 1350 bitabiriye irushanwa rya Ironman 70.3 Durban ryabereye mu gihugu cya Afurika y’Epfo ku Cyumweru tariki ya 04 Kamena 2023.

Mu bakinnyi 956 basoje iri rushanwa bakina ku giti cyabo hatabariwemo 394 bakinnye mu buryo bw’amakipe, Ishimwe Hertier yasoreje ku mwanya wa 46 akoresheje ibihe bihwanye n’amasaha 4, iminota 57 n’amasegonda 27.

Uretse kwegukana umwanya wa 46, Ishimwe yegukanye umwanya wa 12 mu bakinnyi 32 bari hagati y’imyaka 18 na 24. Mu kiciro cy’abagabo, yegukanyemo umwanya wa 44 mu bakinnyi 672.

Mu gusiganwa mu Mazi, Ishimwe Hertier yakoresheje iminota 35, gusiganwa ku Igare akoresha amasaha 2, iminota 44 n’amasegonda 11.

Gusiganwa ku Maguru, yakoresheje ibihe bihwanye n’isaha 1, iminota 30 n’amasegonda 10.

Muri rusange, yatangiye isiganwa ku isaha ya saa moya n’iminota 21 n’amasegonda 40, arisoza ku isaha ya saa sita n’iminota 19 n’amasegonda 06.

Uretse Ishimwe Hertier, abandi bakinnyi b’ikipe y’Igihugu bajyanye nawe muri iri rushanwa barimo; Maniragaba Jack Roger na Uwineza Hanani basoreje ku mwanya wa 235 na 452.

Ku rushanwa Koga mu Mazi, Maniragaba yakoresheje iminota 33 n’amasegonda 37, ku Igare akoresha amasaha 2 n’iminota 56, mu gihe ku Maguru yakoresheje amasaha 2, iminota 5 n’amasegonda 7.

Mu kiciro cy’imyaka iri hagati ya 18 na 24, yasoreje ku mwanya wa 12 mu bakinnyi 32, mu gihe mu kiciro cy’abagabo yasoreje ku mwanya w’i 190 mu bakinnyi 672.

Mu gihe Uwineza Hanani yakoresheje ibihe bihwanye n’amasaha 6, iminota 17, amasegonda 41.

Koga mu Mazi, yakoresheje iminota 45 n’amasegonda 43, gusiganwa ku Igare akoresha amasaha 3, iminota 25 n’amasegonda 15 mu gihe ku maguru yakoresheje isaha 1, iminota 56 n’amasegonda 09.

Mu kiciro cy’imyaka iri hagati ya 25 na 29, yegukanye umwanya wa 20 mu bakinnyi 48, mu gihe mu kiciro cy’abagore muri rusange yegukanye umwanya w’i 101 mu bakinnyi 269.

https://theupdate.co.rw/triathlon-ikipe-yigihugu-yitabiriye-irushanwa-rya-ironman-70-3-durban/

Iri rushanwa ryegukanywe na Matthew RALPHS wo muri Afurika y’Epfo akoresheje amasaha 4, iminota 2 n’amasegonda 23.

Umwanya wa kabiri n’uwa gatatu nayo yegukanywe n’abakinnyi bo muri Afurika y’Epfo, Rudolf NAUDE yegukanye umwanya wa kabiri akoresheje amasaha 4, iminota 13 n’amasegonda 04 mu gihe James Stuart yegukanye umwanya wa 3 akoresheje amasaha 4, iminota 16 n’isegonda 01.

Nyuma y’iri rushanwa, irindi rya Ironman 70.3 rizongera gukinirwa kuri ubu butaka bw’Afurika tariki ya 05 Kanama 2023, ribere mu Karere ka Rubavu mu Ntara y’Uburengerazuba bw’Igihugu, rikaba rizwi ku izina rya Ironman 70.3 Rubavu.

Nyuma yo gusoza iri rushanwa, itsinda ry’u Rwanda ryari riyobowe na Bwana Mbaraga Alex, Perezida w’Ishyirahamwe ry’umukino wa Triathlon mu Rwanda, Visi Perezida Habarugira Kaviri Pierre Celestin, Maniragaba Jack Roger, Ishimwe Hertier, Uwineza Hanani n’Umutoza Uwamukuza Jean Baptiste bageze mu Rwanda kuri uyu wa mbere.

Biteganyijwe ko abakinnyi bahita basubira mu makipe yabo, bagakomeza imyitozo yo kwitegura amarushanwa y’imbere mu gihugu ndetse na mpuzamahanga ateganyijwe mu minsi iri imbere.

Amafoto