Intambara ikomeje kubera mu Burasirazuba bwa Repubulika ya Demokarasi ya Congo, ishyamiranyije Inyeshamba z’Umutwe wa M23 n’Ingabo za Repubulika ya Demokarasi ya Congo (FARDC), ikomeje kugira ingaruka ku buzima bw’abaturage bo mu Karere ka Rubavu mu Burengerazuba bw’u Rwanda.
Umuvugizi w’Ingabo z’u Rwanda (RDF), Brig. Gen. Ronald Rwivanga, yatangaje ko Ibisasu byavuye muri iyi ntambara, byahitanye Abanyarwanda 5 bikomeretsa 30.
Mu kiganiro na Televiziyo y’Igihugu (RTV), Rwivanga yavuze ko amasasu yo mu bwoko butandukanye yaguye ku butaka bw’u Rwanda.
Yagize ati:“Hakurya y’umupaka hateganye na Rubavu, Repubulika ya Demokarasi ya Congo (FARDC) na FDLR barashe ku butaka bwu Rwanda”.
Yahamije ko ibi bisasu byahitanye abantu ubuzima bw’abatanu, bikomeretsa 35. Abakomeretse bahise boherezwa ku mavuriro atandukanye ngo bitabweho.
Nyuma y’ibi, yageneye abaturarwanda ubutumwa, agira ati:“Ingabo z’u Rwanda zirahumuriza ko umutekano ari wose n’ubusugire bw’Igihugu bikomeje kurindwa neza”.
“RDF irafata ingamba zishoboka kandi zikenewe kugira ngo hirindwe ibitero byambukiranya imipaka byagabwa ku butaka bw’u Rwanda.”
Yaboneyeho kwemeza ko hari gukoreshwa ubwirinzi bwo mu kirere, aho ibisasu byangizwa mbere y’uko bigera aho birashwe.
Yakomeje avuga ko hari imodoka z’intambara ziri kugaragara mu Karere ka Rubavu, zishinzwe gukora ubwirinzi ku bitero byagabwa mu Rwanda.
Muri iki kiganiro na Televiziyo y’Igihugu, yahamije ko u Rwanda rwakiriye abasirikare barenga 120 bo mu ngabo za Repubulika ya Demokarasi ya Congo (FARDC).
Aba, babanje kwamburwa intwaro, bahabwa ubuhungiro ku butaka bw’u Rwanda.
Nyuma y’uko mu rukerera rwo kuri uyu 27 Mutarama, Umutwe wa M23 utangaje ko uri kugenzura Umujyi wa Goma, hakomeje kumvikana urufaya rw’amasasu muri uyu Mujyi.
Bimwe mu bisasu biri gukoreshwa muri iyi ntambara, biri kugwa ku butaka bw’u Rwanda mu Karere ka Rubavu.
