Byashoboka ko ari rwo wafashe, ni urukingo rwatewe abantu babarirwa muri za miliyoni nyinshi ku isi.
Nyuma ya doze miliyari eshatu, inkingo za Covid za Oxford-AstraZeneca zigiye guhagarikwa.
Uruganda rwa AstraZeneca rwavuze ko “rutewe ishema cyane” n’uru rukingo, ariko ko rwafashe umwanzuro kubera impamvu z’ubucuruzi.
Rwavuze ko kwiyongera kw’amoko mashya ya coronavirus gusobanuye ko hakenewe inkingo nshya kandi zigezweho.
Uru rukingo rufatwa nk’urwarokoye miliyoni z’abantu mu gihe cy’icyorezo Covid-19, ariko mu buryo bw’imbonekarimwe, rwanateje kuvura kw’amaraso, hamwe na hamwe kwahitanye abantu.
Mu gutanguranwa gukiza isi za ‘guma mu rugo’, uru rukingo rwakozwe n’abahanga muri siyanse bo muri Kaminuza ya Oxford yo mu Bwongereza mu gihe gito bitarabaho.
Uru rukingo rwakozwe mu gihe cy’amezi 10, mu gikorwa ubundi kimara imyaka 10.
Mu Ugushyingo (11) mu 2020, rwatangajwe nk'”urukingo rw’isi” kuko rwari ruhendutse kandi rworoshye kubika kurusha izindi nkingo za Covid.
Icyo gihe uruganda rutura rw’imiti, AstraZeneca, rwiyemeje gukora doze nyinshi zishoboka.
Doze zigera ku 240,000 za AstraZeneca ni zo rukingo rwa mbere rwa Covid rwageze mu Rwanda rugenewe benshi, hari ku wa gatatu tariki 03 Werurwe (3) 2021, nk’uk bivugwa na OMS, nyuma gato hahise haza n’iza Pfizer.
Ubu bwoko bw’urukingo ruri mu zatewe abantu benshi mu Rwanda mu gihe cyo gukingira Covid.
Rukiboneka, ni rwo rwabaye ingenzi mu gukingira Abongereza bakava muri ‘guma mu rugo’.
Prof Adam Finn wo muri Kaminuza ya Bristol, ati: “Ukuri ni uko rwakoze itandukaniro rikomeye, ni rwo rwatuvanye mu kaga kari katwugarije icyo gihe, rufatanyije n’urundi rukingo rwa Pfizer.”
Gusa, izina ryarwo ryandujwe no kuvura kw’amaraso kw’imbonekarimwe kwibasiye bamwe, byatumye Ubwongereza bwo bujya ku zindi.
Mu itangazo, uruganda rwa AstraZeneca rwagize ruti: “Dushingiye ku mibare y’abigenga, abantu barenga miliyoni 6.5 bakijijwe n’uru rukingo mu mwaka wa mbere gusa.
“Umuhate wacu washimwe na za leta zitandukanye ku isi kandi ufatwa nk’ingenzi mu kurangiza icyorezo cyari cyibasiye isi.”
Ruvuga ko gukora inkingo nshya zo guhashya ubwoko bushya bwa Covid burimo gukwirakwira ubu bisobanuye ko ubu “hacyenewe cyane inkingo nshya”, bityo habaye “kugabanuka mu gukenera” ruriya rukingo “rutagikorwa cyangwa ngo rutangwe”.
Prof Finn ati: “Ntekereza ko gukuraho ruriya rukingo bisobanuye gusa ko nta cyo rukimaze.
“Byabonetse ko iyo virusi yihinduranya cyane kandi ikabasha guhunga za nkingo za mbere, rero bagomba kugendana n’ibihe kandi inkingo zigezweho ni zo zishobora kuba zikenewe gukoreshwa ubu.” (BBC)
