Umutwe wa M23 urwanya Leta ya Repubulika ya Demokarasi ya Congo, uvuga ko udashobora kuva mu Mujyi wa Masisi ho muri Kivu y’Amajyaruguru, agace uheruka gufata mu mpera z’Icyumweru gishize.
Uyu mutwe wasubizaga ibyasabwe n’Ishyirahamwe ry’Ubumwe bw’Uburayi ya Leta Zunze Umwe za Amerika.
Mw’itangazo, ibyo bihugu bibwiriza M23 kuva muri uwo mujyi ngo kuko bisubiza inyuma intambwe yari igezweho n’ibiganiro bya Luanda.
Mu kiganiro n’Ikinyamakuru cy’Abongereza BBC dukesha iyi nkuru, umuvugizi wa M23, Balinda Oscar, yashimangiye ko badashobora kuva i Masisi kuko ari iwabo.
Ati:“Agahenge twubahiriza ni kamwe, n’ako twashyizeho umukono. Ubundi bwose buvugwa tutashyizeho umukono ntabwo tubuzi. Ako twashyizeho umukono twagasinye tariki 07 Werurwe 2023”.
Yakomeje agira ati:“Umuhuza wari wadutumiye i Luanda, yari yatwijeje ko agiye guhamagara Leta ya DR-Congo nayo igasinya kuri aya masezerano y’agahenge. Kugeza ubu, Leta ya DR-Congo ntirasinya, kandi nibyo twe duhora dusaba. Gusa, Leta ya DR-Congo yarinangiye”.
“Ibyo bavuga ngo dusubire inyuma, twebwe tuba twirwanaho. Mu minsi ishize, Perezida wa DR-Congo, Félix Tshisekedi yagiye i Burundi gusaba izindi Ngabo ngo zize kuturangiza, bohereje amakamyo 22 ava i Bukavu aza i Kalehe bashaka kudutera ahitwa i Ngungu ngo baturangize. Niba twarirwanyeho tukaba tukiriho, Isi irashaka ko baturangiza”.
“Ibyo Amerika n’Uburayi basaba, n’ukwemera ko umuntu bamwica bakamurangiza, aho turi ni kuri gakondo iwacu. Uko hitwa nitwe twahise, dufite uburenganzira bwo kuhaba. Bivuze ko tutaza kuva muri uyu Mujyi nk’uko babidusabye”.