Koga: Ikipe y’Igihugu irimbanyije imyitozo mbere yo kwerekeza muri Shampiyona ny’Afurika yo ku Mucanga

Ikipe y’Igihugu y’umukino wo Koga, irimbanyije imyitozo iri gukorera mu Karere ka Karongi mu Kiyaga cya Kivu, mbere yo kwerekeza muri Shampiyona ny’Afurika ikinirwa ku Mucanga “Africa Beach Games” izabera muri Tuniziya mu Mujyi wa Hammamet guhera tariki ya 23 kugeza ku ya 30 Kamena 2023.

Iyi kipe igizwe na Dusabe Claude, Iradukunda Eric, Maniraguha Eloi, Hategekimana Timamu, Nyirabyenda Neema na Ishimwe Claudette. Bose bakaba ari ab’ikipe ya Cercle Sportif de Karongi.

Guhera tariki 25 Gicurasi, iyi kipe ikora imyitozo kabiri ku munsi abakinnyi bataha, mu gihe biteganyijwe ko mu Cyumweru gitaha itangira umwiherero.

Biteganyijwe ko muri aba bakinnyi batandatu (6), abahungu bane (4) n’abakobwa babiri (2), umutoza Niyomugabo Jackson, azahitamo babiri (2), umukobwa n’umuhungu bazerekeza i Hammamet guhatana mu Ntera ya Kilometero eshanu (5KM).

Hashingiwe ku Irushanwa ryakorewe mu Karere ka Karongi mu Kwezi gushize ryari rigamije guhitamo abakinnyi bazahagararira ikipe y’Igihugu, ryasize Dusabe Claude ariwe ukoresheje ibihe byiza mu bagabo (1h18’45’’53’’’), mu gihe mu bagore Nyirabyenda Neema yakoresheje 1h38’26’’27’’’.

Kugeza ubu, abakinnyi bazahagararira u Rwanda muri iyi mikino igiye gukinwa ku nshuro yayo ya kabiri, uretse umukino wo Koga, abandi ni abo mu mikino ya Kung-Fu Wushu n’ikipe ya Basketball.

Kugeza ubu ntagihindutse, amakipe ahagarariye Ibihugu 52 niyo azitabira iyi mikino, akazaba agizwe n’abakinnyi 1,110.

Uretse abakinnyi, azaba aherekejwe n’abasaga 500 mu gihe abakorerabushake 300 bitezwe kuzagira uruhare mu migendekere myiza y’iyi mikino.

Amafoto