Rutahizamu mpuzamahanga w’Ikipe y’Igihugu y’Ubwongereza n’iya FC Bayern Munchen, agiye kwigukana igikombe cya mbere mu mateka nyuma y’imikino isaga 500.
Uyu usanzwe ari kapiteni w’Ubwongereza, n’ubwo afatwa nk’umwe muri ba rutahizamu beza ku Isi, ntabwo yakunze guhirwa no kwegukana ibikombe kandi kimwe mu biranga amateka y’umukinnyi.
Kane wubatse ibigwi mu ikipe ya Tottenham akayigeza ku mukino wa nyuma wa UEFA Champions League akanafasha ikipe y’Igihugu y’Ubwongereza kugera ku mukino wa nyuma w’igikombe cy’Uburayi, kuri iyi nshuro agiye kwinjira mu bakinnyi batwaye igikombe mu mateka yabo.
Kuri iyi nshuro, uyu mugabo w’Imyaka 31 y’amavuko, agiye kwegukana igikombe cya Shampiyona y’Ubudage, Bundesliga.
Yagiye muri FC Bayern Munchen mu Mpeshyi y’i 2023, nyuma y’Imyaka 14 akinira Tottenham yo ku Murwa mukuru w’Ubwongereza, London.
Umwaka we wa mbere akigera mu Budage ntabwo yahiriwe, kuko Shampiyona yatwawe na Bayer 04 Leverkusen, igikombe yatwaye idatsinzwe umukino n’umwe.
Mu gihe habura imikino 3 gusa ngo Shampiyona y’Ubudage y’umwaka w’i 2024-25 ishyirweho akadomo, Bayern Munchen iyoboye urutonde n’amanota 75, irusha amanota 8 mucyeba wayo, Bayer 04 Leverkusen.
Ibi akaba aribyo biha ikizere Harry Kane cyo gukuraho amateka mabi yari yanditse mu rugendo rwe rwa ruhago.
Nta gihindutse, tariki ya 10 Gicurasi 2025, Bayern Munchen ishobora gutwarira igikombe ku mukino uzayihuza na Borussia Moenchengladbach.
Gusa, uyu mukino Kane ntazawukina, nyuma yo kuzuza amakarita 5 y’Umuhondo. Iya 5 yayihawe mu mukino batsinzemo Mainz ibitego 3-0
Ubwo azaba amaze kwegukana Igikombe cya Shampiyona mu Budage, bivugwa ko Kane azahita asubira mu Bwongereza gukina muri Premier League.
Bivigwa ko icyo yifuzaga ari uko ma mateka ye hazandikwa ko yegukanye igikombe cya Shampiyona ndetse n’umukinnyi watsinze ibitego byinshi muri Shampiyona y’Ubwongereza.
Mu Bwongereza, Kane yahatsinze ibitego 213, akaba arushwa ibitego 47 na Alan Shearer uyoboye abatsinze ibitego byinshi.
Mu gihe yaramuka akasubiye, bivugwa ko yahitira muri Tottenham yubatsemo ibigwi, cyangwa mu makipe arimo; Manchester United, Chelsea cyangwa Arsenal.
Mu ikipe ya Tottenham, Kane yahatsinze ibitego 280 mu mikino yose yayikiniye, mu gihe mu Budage, amaze gutsinzira Bayern Munchen ibitego 60 mu mikino 61.
Mu ikiganiro n’itangazamakuru yavuze ko atishimiye kuba atazakina umukino wari kuba uw’amateka kuri we, ariko nibegukana Igikombe azabyishimira kurusha abandi.
Amafoto
