Ikipe y’Igihugu y’abatarengeje imyaka 18 na 20 yakatishije itike ya 1/2 cy’Imikino y’Akarere ka Gatanu ‘IHF Trophy Zone 5’ iri kubera i Addis Ababa muri Ethiopia.
Kuri uyu wa Gatatu, tariki ya 15 Gicurasi 2024, ni bwo hakinwe imikino y’umunsi wa gatatu mu matsinda.
Ikipe y’Igihugu ya Handball mu Batarengeje imyaka 20 yatsinze iy’u Burundi ibitego 38-25, igera ku mukino wa 1/2 mu ya ‘IHF Trophy Zone 5’.
Mu batarengeje imyaka 18, u Rwanda rwageze muri 1/2 nyuma yo kunganya na Ethiopia ibitego 29-29. Biteganyijwe ko ruzahura na Kenya ku wa Kane, tariki ya 16 Gicurasi 2024.
Amakipe yombi mu byiciro arimo yasoje ari ku mwanya wa mbere, ayobora amatsinda yarimo.
Irushanwa rya IHFTrophy rihuza amakipe yo mu Karere ka Gatanu (Zone 5), ryatangiye ku wa 12 Gicurasi, rizasozwa ku wa 17 Gicurasi 2024. Akarere ka Gatanu kabarizwamo ibihugu birimo u Rwanda, u Burundi, Kenya, Ethiopia, Tanzania, Uganda, Djibouti, Sudani y’Epfo, Somalia na Sudani.
Ikipe y’Igihugu y’u Rwanda U18 itozwa na Ngarambe François Xavier wungirijwe na Ndabikunze Alexis, mu gihe iy’Abatarengeje Imyaka 20 itozwa na Mudaharishema Sylvestre na Nzayisenga Aimable.
U Rwanda ni rwo rwegukanye IHF Trophy ryabereye i Dar es Salaam muri Tanzania mu 2023 mu bagabo n’abagore.
Amafoto
.
Ikipe y’Abatarengeje imyaka 20 na yo yitwaye neza
