Guhera kuri uyu wa 04 Werurwe kugeza tariki ya 12 Werurwe 2023, Ishyirahamwe ry’Umukino wa Cricket mu Rwanda na Dafabet bateguye Irushanwa bise Dafabet RCA T10 Women’s Tournament 2023.
Umunsi wa mbere w’iri rushanwa ryitabiriwe n’amakipe atanu (5) y’abagore, ukaba wasize amakipe agaragaje ko yari anyotewe no kugaruka mu Kibuga, mu mikino yabereye ku Kibuga mpuzamahanga cy’uyu mukino kiri i Gahanga mu Mujyi wa Kigali mu Karere ka Kicukiro.
Amakipe atanu (5) agizwe na; WHITE Clouds Cricket Club, SORWATH Cricket Club, INDATWA HAMPSHIRE Cricket Club, CHARITY Cricket Club na GAHANGA QUEEN’S Cricket Club niyo yaryitabiriye. Aya akaba asanzwe abarizwa mu kiciro cya mbere.
Ku ikubitiro, kuri uyu wa Gatandatu iyi mikino ikaba yatangiye hakinwa imikino itatu, yabimburiwe n’uwahuje White Clouds Cricket Club yatanagiye icakirana n’Indatwa Hampshire Cricket Club, mu mukino watangiye guhera saa 09:00 ku Isaha ya Kigali.
Muri uyu mukino, White Clouds Cricket Club niyo yatsinze Toss (Guhitamo kubanza gutera Udupira ‘Bowling’ cyangwa gutangira bakubita Udupira ‘Batting’), ihitamo gutangira idukubita (Batting).
Igice cya mbere cy’Umukino, White Clouds yagisoje igitsinzemo amanota 42 mu dupira 60 duhwanye na Overs 10 bakinnye.
Mu gihe Indatwa yakuye mu Kibuga abakinnyi 4 ba White Clouds, ibizwi nka (4 Wickets) mu rurimi w’uyu mukino.
Igice cya kabiri cy’uyu mukino, cyatangiye Indatwa zorohewe, kuko muri Overs 6 n’Agapira 1, bari bamaze gukuramo ikinyuranyo cyari cyashyizweho na White Clouds.
Uyu mukino ukaba warangiye Indatwa ziwegukanye nyuma yo kuwutsinda ku kinyuranyo cya Wickets 7. Nyuma yo gutsinda amanota 43, mu gihe abakinnyi bayo bakuwe mu kibuga ari 3 gusa.
Muri uyu mukino, HENRIETTE Ishimwe niwe watowe nk’Umukinnyi wahize abandi.
Mu mukino wakurikiyeho watangiye guhera saa 11:30 SORWATHE Cricket Club yacakiranye na GAHANGA QUEEN’S Cricket Club.
Sorwathe Cricket Club niyo yatsinze Toss, ihitamo gutangira itera Udupira(Bowling), mu gihe Gahanga Queen’s Cricket Club yatangiye idukubita ibizwi nka Batting.
Mu dupira 60 twahanye na Overs 10, ikaba yatsinzemo ikaba amanota 57, mu gihe abakinnyi 2 ba Gahanga Queen’s Cricket Club aribo wakuwe mu kibuga (2Wicket).
Uyu mukino ukaba warangiye Sorwathe iwegukanye ku kinyuranyo cya Wickets 4, nyuma yo kuwusoza iwutsinzemo amanota 58, muri Overs 9 n’udupira 2, mu gihe Gahanga Cricket Club yakuye mu kibuga abakinnyi bayo 6.
GEOVANIS Uwase wa Gahanga Queen’s Cricket Club, akaba yatowe nk’uwawuhizemo abandi.
Nyuma y’imikino ya mbere ya saa Sita, ku Gicamunsi guhera saa 13:45′ yakurikiyeho umukino wahuje CHARITY Cricket Club na WHITE Clouds Cricket Club, umukino CHARITY Cricket Club yegukanye ku kinyuranyo cya Wickets 9.
Muri uyu mukino, White Clouds niyo yatangite ikubita Udupira (Batting), ishyiraho amanota 45 mu Dupira 60, mu gihe Charity Cricket Club yakuye mu kibuga abakinnyi 9 bayo (9Wickets).
Muri Overs 7 n’Agapira 1, Charity Cricket Club, yari imaze gukuraho ikinyuranyo cyari cyashyizweho na White Clouds Cricket Club, mu gihe yari gutsindamo aamanota 46, ari nako umukinnyi 1 ariwe wakuwe mu kibuga.
Muri uyu mukino, BIMENYIMANA Marie Diane wa Charity Cricket Club yawuhizemo abandi bose.
Bwana Emmanuel Byiringiro ushinzwe ibikorwa mu Ishyirahamwe ry’Umukino wa Cricket mu Rwanda, agaruka kuri iri Rushanwa, yavuze ko ariryo ribimburiye andi azaranga uyu Mwaka muri iri Shyirahamwe.
Yakomeje avuga ko azanafasha Ikipe y’igihugu y’Abari n’Abategarugori yitegura kwerekeza mu gihugu cya Nijeriya, aho izitabira Irushanwa ryateguwe n’Ishyirahamwe rya Cricket muri iki gihugu.
Twibutse ko Ikipe y’Igihugu y’u Rwanda, ariyo yaryegukanye mu Mwaka ushize.
