Shema Osban ukinira Ikipe y’Ingabo z’u Rwanda, APR BBC, yagiye kuvurirwa muri Qatar nyuma yo kuvunikira ku mukino wa nyuma w’Irushanwa ryo kwibuka ku nshuro ya 31 Jenoside yakorewe Abatutsi [GMT 2025], wahuje Ikipe ye na UGB ku cyumweru gishize.
Uyu mukino warangiye APR BBC iwutsinze n’amanota 94-92, Shema yawukuyemo Imvune izwi nka ACL.
ACL n’Imvune iterwa no kuvunika k’Umutsi uhuza uruhiniro rw’Ivi. Akenshi uwayivunitse, amara hanze y’Ikibuga amezi atari munsi y’Atandatu cyangwa Umunani.
Kuri uyu wa Gatandatu, Shema w’Imyaka 27, nibwo yagiye kubagirwa [Kuvurirwa] muri Qatar, cyane ko hari mu hafite ubuvuzi bugezweho buvura iyi mvune.
Azavurirwa mu Bitaro bya Aspetar, bimwe mu bigezweho bivura Imvune za Siporo biri mu Mujyi wa Doha.
Bamwe mu bakinnyi babagiwe iyi Mvune muri ibi Bitaro, barimo Umunya-Brazil, Neymar Jr wahavuriwe muri Mutarama [1] y’Umwaka w’i 2023.
Uretse Shema, Nobel Boungou Colo n’undi mukinnyi wa APR BBC wavunikiye muri uyu mukino, we akaba yaramaze guhabwa Ubuvuzi, yaherewe muri Clinique Jouvenet – Ramsay Santé mu Bufaransa. Colo yavunitse Akagombambari [Tendon d’Achille].
Aba bakinnyi bombi ntabwo bagikinnye amajonjora ya nyuma y’imikino ya BAL [Basketball Africa League], iteganyijwe kuzabera i Kigali hagati ya tariki ya 17-25 z’Ukwezi kwa Gicurasi [5] 2025.
Amafoto
