Perezida wa Reta Zunze Ubumwe za Amerika, Joe Biden, yashimagije Jimmy Carter, wabaye Perezida wa Amerika wa 39.
Yabigarutseho muri Misa yo ku musezeraho bwa nyuma yabereye i Washington DC.
Joe Biden, yatangiye ashimagiza nyakwigendera Jimmy Carter, akomoza ku rugendo yagiriye mu Mujyi avukamo wa Plains, muri Leta ya Georgia ubwo yamusuraga.
Yavuze ko bwari bwo bwa nyuma yabonye Jimmy Carter mbere y’uko yitaba Imana.
Biden yatangaje ko we n’umugore we, Jill Biden, basuye Jimmy Carter n’umugore we, Rosalyn Carter, babakira nk’umuryango.
Yakomeje atangaza ko ubucuti bwe na Carter bwamwigishije kuba Umugabo w’ijambo no kwumva ko abantu bose bakwiriye guhabwa Icyubahiro.
Misa yo gusezera Jimmy Carter, yabereye muri Katedarale nkuru y’Igihugu mu Mujyi wa Washington DC.
Yitabwe n’Abaperezida ba Amerika 5 bakiriho. Barimo Donald Trump uheruka gutsinda amatora n’abahoze ari Baperezida, Bill Clinton, Barack Obama na George W. Bush.
Misa yo gusabira no gusezera Jimmy Carter, yafashwe nk’umwanya udasanzwe, aho abahoze ari Abaperezida bahuye, iminsi micye imbere y’uko Donald Trump arahirira kuyobora Amerika muri Manda ya kabiri i Washington, tariki ya 20 Mutarama 2025.
Amafoto
