Kuri iki Cyumweru tariki ya 14 Nyakanga 2024, Abanyarwanda batuye cyangwa bakorera hanze y’u Rwanda bazwi nka Diaspora, batoye Umukuru w’Igihugu n’Abadepite.
Aya matora agamije guhitamo uzayobora u Rwanda muri Manda y’Imyaka 5 iri imbere. Ni ukuvuga, guhera muri uyu Mwaka w’i 2024 kugeza mu 2029.
Abakandida bahataniye Intebe yo mu Rugwiro, bagizwe na Kagame Paul w’Umuryango FPR-Inkotanyi, Habineza Frank w’Ishyaka DGPR na Mpayimana Philippe, Umukandida wigenga.
Uretse ku mwanya wa Perezida, hari kandi Abakandida ku mwanya w’Abadepite, batanzwe n’amashyaka atandukanye ndetse n’imitwe ya Politike. Hari kandi n’abakandida depite bigenga.
Ukwiyamamaza kuri izi mpande zombi, kwatangiye tariki ya 22 Kamena, gusozwa kuri uyu wa Gatandatu tariki ya 13 Nyakanga 2024.
Muri aba Banyarwanda bo muri Daispora batoye kuri iki Cyumweru, barimo Ingabo na Polisi bakorera Ubutumwa muri Repubulika ya Santrafurika nk’uko byagiye bigaragara ku mbuga Nkoranyambaga.
Abitabiriye aya matora bari ku Migabane hafi ya yose, irimo Umugabane w’Uburayi, Amerika, Aziya, Oseaniya ndetse n’Afurika ari nayo ifite umubare munini.
Umunyarwanda watoye bwa mbere yatoreye muri Nouvelle-Zélande kuri Site y’ahitwa Waitākere Community Strust Hall mu Mujyi wa Auckland.
Aha hatoreye kandi Abanyarwanda barimo abasaga 70 n’abandi baba muri uyu mujyi n’abaturutse mu yindi iri mu ntera y’ibilometero bisaga 2000.
Uretse abo kuri uyu Mugabane wa Oseyaniya, abandi batoye barimo abo mu biguhu bya; Kenya, Uganda, Tanzaniya, Ubufaransa, Koreya y’Epfo, Ubushinwa, Ubufaransa, Ubwongereza, Suwede, Ububiligi, Luxamburu, Ubutaliyani, Congo Braza-Ville n’ahandi..
Kuri uyu wa mbere guhera saa 07:00 za mugitondo kugeza saa 15:00, Abanyarwanda b’imbere mu gihugu nabo barihitiramo ubuyobozi bubabereye mu Myaka 5 iri imbere.