Ikipe y’Akarere ka Gisagara ‘Gisagara Volleyball Club’ n’iya Polisi y’u Rwanda ‘Police Women’s Volleyball Club’, zaraye zegukanye Irushanwa ryo Kwibuka ku nshuro ya 29 Jenoside yakorewe Abatutsi mu 1994.
Gisagara yegukanye igikombe itsinze REG VB ku mukino wa nyuma amaseti 3-0 , ari nako Police WVB (25-20,25-10,25-14) yabigenje imbere ya Rwanda Revenue Authority (RRA WVB).
Umwanya wa gatatu wegukanywe na APR VB na APR WVB.
Mu bagabo, APR VB yatsinze IPRC Ngoma, mu gihe mu bagore APR WVB yatsinze Ruhango WVB.
Mbere yo kugera ku mukino wa nyuma, REG VB yakuyemo APR VB ku ntsinzi y’amaseti 3-2, mu gihe Gisagara yakuyemo IPRC Ngoma ku ntsinzi y’amaseti 3-0.
Mu kiciro cy’abagore, Police yari yakuyemo APR WVB ku ntsinzi y’amaseti 3-1 mu gihe Rwanda Revenue Authority (RRA), yasezereye Ruhango WVB.
Ibihembo
Abagabo:
- Gisagara + 1,000,000 Frw
- REG VB + 700,000 Frw
- APR VB + 500,000 Frw
Abagore:
- Police WVB + 1,000,000 Frw
- Rwanda Revenue Authority (RRA) + 700,000 Frw
- APR WVB + 500,000 Frw.
Umwaka ushize, iri Rushanwa ryari ryatwawe na REG VB mu bagabo mu gihe APR WVB yari yaryegukanye mu bagore.
Irushanwa ryo Kwibuka Jenoside yakorewe Abatutsi ni irushanwa rikinwa buri uko umwaka utashye guhera mu 1995, rikaba rikinwa mu rwego rwo Kwibuka inzirakarengane zazize Jenoside yakorewe Abatutsi, by’umwihariko abari abakinnyi, abatoza, abasifuzi, abayobozi n’abandi bari bafite aho bahuriye n’umukino wa Volleyball.
Kuri iyi nshuro ya 29, amakipe 21 arimo ayo mu bihugu bya Uganda, Sudani y’Epfo na Kenya yitabiriye iyi mikino.
Bwana Ngarambe Raphael uyobora Ishyirahamwe ry’umukino wa Volleyball mu Rwanda (FRVB), yavuze ko iri rushanwa rikinwa mu rwego rwo kunamira no kuzirikana Jenoside yakorewe Abatutsi, by’umwihariko umuryango mugari wa Volleyball wibuka abari bawugize bishwe.
Yasabye abari bitabiriye iyi mikino, kurangwa n’ubumwe no guharanira ko Jenoside itazongera ukundi haba mu Rwanda n’ahandi ku Isi.
Yashimiye kandi Perezida Kagame ku ruhare rwe mu guteza imbere Siporo by’umwihariko yitsa ko iri rushanwa ritari gukinwa iyo ataza gufata iya mbere ngo ahagarike Jenoside yakorewe Abatutsi, kuko umugambi wari ukubamaraho bose nta numwe usigaye.
Bamwe mu bazize Jenoside yakorewe Abatutsi mu muryango wa Volleyball
1. Iminamikore Bejamin (Yakiniraga ikipe ya UNR Butare)
2. Murekezi Regis (UNR Butare)
3. Ntagugura Placide (UNR Nyakinama)
4. Ntagwabira Basile (UNR Nyakinama)
5. Kumuyange Egide (UNR Nyakinama)
6. Karonji Canisius (UNR Nyakinama
7. Hategekimana Emmanuel (UNR Nyakinama)
8. Gasinzigwa Michel (UNR Nyakinama)
9. Rutayisire Théoneste (UNR Nyakinama),
10. Niyongira Justin (UNR Nyakinama),
11. Kagenza Alphonse (UNR Nyakinama)
12. Rwagashayija Innocent (GSO Butare)
13. Kayiranga Eric (GSO Butare)
14. Kamonyo Jean Pierre (Yakiniraga ikipe ya GSO Butare),
15. Gabiro Eugene (GSO Butare),
16. Ngoga Sebalinda Dominique (GSO Butare),
17. Butare Alpfred Toto (GSO Butare)
18. Mukeshimana Martin (Buhiri ubu yitwa KVC)
19. Ulimubenshi Vénant (KVC)
20. Rukamba Jean Marie Vianney (KVC),
21. Mugandura Jean de la Croix (KVC),
22. Gasana Callixte (KVC)
23. Ntaganira Innocent, Théogène (KVC)
24. Hategekimana Innocent (Petit Seminaire de Butare)
25. Sebalinda Gilles (Petit Seminaire Butare)
26. Gakebuka Camile (Petit Seminaire de Butare)
27. Ngarambe JMV (Petit Seminaire de Butare)
28. Tumukuze Jean Bosco (Petit Seminaire de Butare)
29. Rutiyomba Toussaint (Petit Seminaire de Butare)
30. Rutsindura Alphonse (Petit Seminaire de Butare),
31. Uwimana Abdallah (Minitransco)
32. Rugira Marcellin (Minitransco)
33. Gakwaya Vincent (Minitransco)
34. Kayigamba André (Minitransco)
35. Ngamije Esdras (Electrogaz)
36. Rudandi Jean Pierre (Electrogaz)
37. Kabagema Sosthène (Electrogaz),
38. Rugira Jean Bosco (Kigoma),
39. Kamanzi Goretti(Les Lionnes),
40. Mignonne (Les Lionnes),
41. Karasira (Ouragan),
42. Rugenera Landouard (College St André),
43. Ugeziwe Jean Berchmas (Petit Seminaire Ndera),
44. Mugaragu William (Ecole des Sciences Byimana)
Amafoto: Shema Innocent
