Ikipe ya Zanshin Karate Academy ikorera mu Karere ka Huye mu Ntara y’Amajyepfo y’u Rwanda, yegukanye Umudali wa Bronze muri Kumite (Kurwana) mu kiciro cy’Abagore n’abagabo, uhabwa Ikipe yabaye iya Gatatu mu Irushanwa ryo Kwibuka Jenoside yakorewe Abatutsi mu 1994, ritegurwa n’Ishyirahamwe ry’Umukino wa Karate mu Rwanda, Ferwaka.
Zanshin Karate Academy, ikesha uyu Mudali kuba yarabaye iya Gatatu muri Kumite (Kurwana) mu kiciro cy’abagore n’iya Gatatu muri Kumite (Kurwana) mu kiciro cy’abagabo
Iri Rushanwa ryakinwe tariki ya 08 Kamena 2024, rikinirwa kuri Tatami (Ikibuga) ya Ecole Notre Dame des Anges i Remera mu Mujyi wa Kigali.
Ryitabiriwe n’amakipe 6 muri Kata (Kwiyereka) mukiciro cy’abagore n’amakipe 8 mu kiciro cy’abagabo.
Mu kiciro cyo Kumite (Kurwana), Amakipe y’abagore yitabiriye iri Rushanwa n’a 6, mu gihe mu bagabo ari 14.
Zanshin Karate Academy yahatanye muri ibi byiciro byose.
Muri Kata, Ikipe y’Agahozo niyo yabaye iya mbere mu bagore, The Champions Sports Academy iba iya mbere mu bagabo.
Muri Kumite, The Champions Sports Academy yahize izindi kipe zose mu kiciro cy’abagore, mu bagabo, The Great Warriors ihanyurana umucyo.
Akomoza ku musaruro bakuye muri iri Rushanw ryo Kwibuka ku nshuro ya 30 Jenoside yakorewe Abatutsi, Umuyobozi wa Zanshin Karate Academy, Sensei Mwizerwa Dieudonné, mu kiganiro kihariye yahaye THEUPDATE yagize ati:“Ku nshuro ya 2 twitabira iri Rushanwa, mu gihe Ikipe yacu imaze Imyaka 3 ishinzwe, guhatana n’amakipe asaga 12 ukegukana Umudali wa Bronze n’iby’agaciro kuri twe”.
“Byadusigiye umukoro wo gukomeza gukora cyane, kugira ngo tuzakomeza kwesa intego twihaye. Abakinnyi baracyari bato, turizera ko mu Myaka iri hagati y’i 3-5 iri imbere, kwegukana Igikombe bishoboka cyane”.
“Umudali wa Bronze twegukanye, uje ukurikira undi nkawo twegukanye mu Irushanwa rya Ambassadors Cup nabwo twari twitabiriye ku nshuro ya mbere. Ibi bimenyetso byose ni simusiga ku kizere duhabwa n’abana dutoza”.
Mu gihe u Rwanda rwibuka ku nshuro ya 30 Jenoside yakorewe Abatutsi no ku nshuro ya 10 hakinwa Irushanwa ritegurwa n’Ishyirahamwe ry’Umukino wa Karate mu Rwanda, Ferwaka, mu rwego rwo Kwibuka Jenoside yakorewe Abatutsi by’umwihariko Abakarateka n’abari Abasiporotifu, Sensei Mwizerwa yagize ati:“Abakinnyi b’Ikipe ya Zanshin Karate Academy bose bavutse nyuma ya Jenoside yakorewe Abatutsi. Binyuze muri iri Rushanwa, tubafasha kubasobanurira Amateka Igihugu cyacu cyanyuzemo. Basobanurirwa ububi bwa Jenoside no kugendera kure Ingengabitekerezo yayo”.
Yasoje agira ati:“Nk’Urubyiruko tubakangurira buri gihe kurwanya Jenoside n’Ingengabitekerezo yayo, ndetse tukabibutsa ko arino Rwanda rw’ahazaza”.
“Nyuma y’iri Rushanwa, tugiye kwitegura Irushanwa rizaba hagati ya tariki 17-18 Kanama 2024, ritegurwa na Zanshin Sport Solutions Ltd ifatanyije na Zanshin Karate Academy”.
“Turashimira by’umwihariko Abafatanyabikorwa bacu barimo; MARTIN HARDWARE & TWYFORD RWANDA na HIGHENDS Tours & Travel Agency badahwema kudutera Inkunga no kudushyigikira mu rugendo rw’Intsinzi.
Amafoto
