Ikipe yaZanshin Karate Academy yo mu Karere ka Huye mu Ntara y’Amajyepfo y’u Rwanda, yegukanye Irushanwa rya ‘The Legend Karate Open’.
Iri rushanwa ry’Abakanyujijeho muri Karate, ryakinwe kuri uyu wa 23 Gashyantare 2025.
Yaryegukanye nyuma yo gukusanya Imidali 10, irimo 3 ya Zahabu, 4 ya Silver n’indi 3 ya Bronze.
Yakurikiwe Mamaru Kicukiro Karate Do, yegukanye Imidali 4, irimo 2 ya Zahabu n’indi 2 ya Silver.
Umwanya wa gatatu wegukanywe n’Ikipe Zen Karate Do n’Imidali 6 yose hamwe. Iyi Midali, irimo 2 ya Zahabu, 1 wa Silver n’indi 3 ya Bronze.
Mu kiciro cy’amakipe, The Warriors Karate Do yafatanyije na Kigali Elite Sports Academy (KESA) gutegura iri rushanwa, yabonye umwanya wa kane, n’Umudali 1 wa Zahabu.
The Legend Karate Open yakinwaga ku nshuro ya kabiri, yitabiriwe n’amakipe 12. Ryitabiriwe n’abakinnyi bakabakaba 100.
Aya makipe yari agizwe na; Zanshin Karate Adacemy, Mamaru Kicukiro Karate Do, Zen Karate Do, The Warriors Karate Do, Hero Karate do Club Rafiki, Shisei Karate do, Kamikaze Karate do, Seishin Karate Do Kamonyi, Flying Eagles, Tsuki Karate Academy, S.U.K.A (Strenght of Unity Karate Academy) na Legend Karate School.
Mu kiciro cy’abakinnyi bakinnye ku giti cyabo, hagati y’Imyaka 30-45 muri Kata (Abagore), Umudali wa Zahabu wegukanywe na Mukagatare Olive (Zanshin Karate Academy), Umudali wa Silver wegukanwa na Kabera Rehema (Zanshin Karate Academy), mu gihe Umudali wa Bronze wegukanywe na Umuhoza Aisha (Zen Karate D0).
Mu bagabo bari muri iki kiciro cy’Imyaka (35-45), bakinnye Kata (Kwiyereka), Umudali wa Zahabu wegukanywe na Gaga Rukorra (Mamaru Kicukiro Karate Do), Umudali wa Silver wegukanwa na Kabayiza William (Zanshin Karate Academy), mu gihe Bronze nayo yatashye muri Zanshin Karate Academy itwawe na Tuyishime Narcisse.
Abagabo bari hejuru y’Imyaka 46 y’Amavuko bakinnye Kata (Kwiyereka), Umudali wa Zahabu wegukanywe na Bugabo Amile (Zen Karate Do), Umudali wa Silver utwarwa na Rwiyamira Kasmu (Hero Karate do Club Rafiki), mu gihe uwa Bronze wegukanywe na Nsana Bakata Claude ukinira Ikipe ya Zen Karate Do.
Nyuma yo gukina Kata (Kwiyereka), hakurikiyeho ikiciro cya Kumite (Kurwana), kiri mu byanyuze abakunzi b’Umukino wa Karate bari mu Nzu y’Imikino ya NPC i Remera mu Mujyi wa Kigali.
Iki kiciro, cyabimburiwe n’Imikino y’Ikiciro cy’abagore (Abakobwa), bari hagati y’Imyaka 35-45.
Muri iki Kiciro, Umudali wa Zahabu wegukanywe na Ingabire Solange (The Great Warriors), Umudali wa Zahabu utwarwa na Kabera Rehema (Zanshin Karate Academy), mu gihe uwa Bronze wegukanywe na Mukagakwerere Marie Claire nawe w’Ikipe ya Zanshin Karate Academy.
Mu bagabo bari hagati y’Imyaka 35-45, Umudali wa Zahabu muri Kumite (Kurwana), wegukanywe na Nkurunziza Jean Claude (Mamaru Karate Do), Nsengimana Elie wa Zanshin Karate Academy yegukana Umudali wa Silver, mu gihe Bizimungu w’Ikipe ya Hero Karate Do Rafiki, yegukanye Umudali wa Bronze.
Mu kiciro cy’Amakipe, muri Kata (Abagabo), Ikipe ya Zen Karate Do yabaye iya mbere, ikurikirwa na Mamaru Karate Do, mu gihe umwanya wa gatatu wegukanywe na Zanshin Karate Academy.
Muri Kumite (Kurwana), mu kiciro cy’Abagore (Abakobwa), umwanya wa mbere wegukanywe n’Ikipe ya Zanshin Karate Academy, uwa kabiri utwarwa n’Ikipe ya Zen Karate Do.
Mu makipe y’Abagabo bakinnye Kumite (Kurwana), umwanya wa mbere wegukanywe n’Ikipe ya Zanshin Karate Academy, Mamaru Kicukiro Karate Do iba iya kabiri, mu gihe umwanya wa gatatu wegukanywe n’Ikipe ya Zen Karate Do.
Nyuma yo gutegura iri rushanwa, mu kiganiro yahaye THEUPDATE, umuyobozi wa KESA, Nkurunziza Jean Claude, yagize ati:“Kuba iri rushanwa ryakinwe ku buryo twaribonyeho, byadushimishije. Amakipe yose yiyandikishije yitabiriye. Iyi n’intsinzi kuri twe”.
“Mu byiciro byose ryakinywe neza, ariko muri Kumite (Kurwana), byabaye akarusho, kuko abafana bari bakumbuye kubona urwego rw’abahoze ari abakinnyi bakomeye imbere mu gihugu. Ndishimira kandi urwego rw’Imisifurire, by’uwmiharimo Mwizerwa Dieudonne, umwe mu basifuzi bakomeye muri Afurika, wadushije kutuyoborera iri rushanwa”.
“Umwaka utaha, iri rushanwa byanze bikunze rizakinwa ku rwego mpuzamahanga, kandi umuhigo twihaye tuzawesa”.
Nkurunziza yasoje agira ati:“Ndashimira abafatanyabikorwa baduteye ingabo mu bitugu, cyane Itangazamakuru ndetse n’abikorera. Badahari ntacyo twageraho, kandi ubufatanye bw’impande zombi nizo mbaraga z’Iterambere rya Karate mu Rwanda”.
Amafoto
